Mga aki sa elementarya hinahasa na sa pagbasa

An City School Division kan Department of Education (DepEd) sa Ciudad nin Naga mandato na sa cada elementary school dapat magkaigwa nin specialized training program na matao nin atensyon sa pagpalangkaw kan kakayahan nin mga aki sa ngaran nin pagbasa.

Si Dr. Mariano De Guzman nagtukaw komo bagong School Superintendent kan DepEd Naga kan Oktubre 2019 nagpahayag sa Bicol Mail an programa saiyang na realisar mantang sa saiyang pag-aadal kaipuhan na mas maging epektivo an pagbasa kan mga aki sa elementarya.

Sa saindang assessment igwang average na 45 por ciento kan mga nasa elementarya kinakaipuhan matabangan magbasa sa english asin ini yaon sa inaapod na frustrated level alagad saiyang piglinaw na bako sindang ‘’nonreaders’’ envez may kadificilan lang sa pagbasa.

Sa pagbasa nin Pilipino o tagalog an average nagaabot sa 29 por ciento alagad an mga ini parejo sa ginibong free test asin saindang piglalaoman na mababa man ini envez malangkaw an independent o tataong sadiring magbasa.

Segun pa sa DepEd Naga an programang ini tamang-tama sa isyu ngonian na maabot sa 70 mil na mga aki sa elementarya sa Bicol an nadidificilan nin english asin Filipino.

Sa bilang na ini, 18,143 mga pupils sa Grade 3 hasta 6 asin an iba inaapod na ‘nonreaders’ sa Grade 1 asin 2.

Sa 28 mga escuelahan sa elementarya sa public school sa Ciudad nin Naga doce nang mga escuelahan an nag-iimplementar kan specialized training program sa pagbasa asin ini kinababalihan kan minasunod; Panicuason Elementary School, Teodoro Moscoso Elementary School, San Isidro Elementary School, Morada Ramos Elementary School, Carolina Elementary School, Carolina High School, Pacol Elementary School, Grand View Elementary School, Sta Cruz Elementary School, Sabang Elementary School asin District wide sa District II.

Ngonian na school year, igwang 29 mil na populasyon sa elementarya asin maabot sa 18 mil sa segundarya.

Sa kaparejong entrevista ki De Guzman, ipinahayag kaini na nabigla siya sa nagluwas na bareta sa sarong peryodico nasyonal na maabot sa 70 mil na aki sa elementarya sa mga public school sa bicol an dai nakakabasa.

Posibleng na-misquote an DepEd asin pigsaro na si resulta sa ginibong free test sa english asin Filipino kaya halangkawon an pinaluwas na datus. Saiyang piglinaw an free test, si test na ginibo itutukdo pa sana alagad si post test matapos kan ginibong leksyon.

Sa huring semana kan Febrero pigtalaan an post test asin digdi piglalaoman na malangkaw na an datus. (dpa)