SA BICOL MEDICAL CENTER: Sales nagpaaram na, pagdemiter dai tinugotan
Nagpaaram na sa mga opisyal kan Malacañan si OIC Medical Director Dr. Francisco Sales III kan Bicol Medical Center (BMC) nganing saiya nang butasan an posisyon huli sa ‘’pressure’ sa saiya kan ibang politico sa Camarines Sur alagad dai tinugotan sagcod pinakiulayan na dai bayaan an hospital.
Si Tommy Lee, Regional Coordinator kan Presidential Anti-Corruption Commission (PACC) sa Bicol nagpahayag sa entrevista kan Bicol Mail sa paagi nin telepono na nagpaaram si Sales ki Presidential Adviser for Bicol Affairs Marvel Clavecilla asin PACC Chairman Dante Jimenez na mawot nang magbuelta bilang private practitioner huli sa pakikiaram sa saiyang trabajo kan ibang politico na dai naman pigdetalye.
An OIC Medical Director nagpasiring pa sa Manila kaibanan si Lee nganing kaulayan sinda Jimenez asin Clavecilla sa saiyang pig-aandaman na pagdemiter sa posisyon sa BMC.
Hinagad kan duwang opisyal kan Malacañan an considerasyon nganing ipadagos an mga reforma na pig-iimplementar sa pinakadakulang hospital sa rehiyon Bicol mantang duwang taon nalang maretiro na ini sa serbisyo.
Si Lee iyo an enot na nakiulay sa OIC Director na dai na muna magdemiter sa posisyon matapos makuanan nin exclusibong entrevista kan Bicol Mail kan ika-duwang semana kan Enero 2020.
Kan hapoton kan BM kun perang por ciento an saiyang plano na tuwadan na an hospital, sinabi kaini na ‘’noventa por ciento (90%).
Sinabi pa na mas kumportable sa saiya an pagiging private practitioner bilang sarong surgeon, ‘’gusto ko na mag-operar dakul an matatabangan ko’.
Alagad kun igwang nakikiaram na politico na dai niya pigngaranan, sinabi pa kaini na dai ini maiibitaran mantang sinda an nagtatabang para sa fondo kan hospital.
Alagad sinabihan ni Lee ipadagos an saiyang posisyon huli ta pinunan na kaini an mga pagbabago sa manijamiento kan BMC asin sa saiyang administrasyon bilang OIC naging operational na an apat na bagong edificio kan hospital.
Si Sales iyo an nagribay ki dating Medical Director Estrella Litam na nagkaigwa nin mga controvercia asin siya an nagribay na tukahan bilang OIC. (DPA)