DILG determinado ibawal an tricycle sa national road

Bakong dahilan na mayong aagihan an mga nagkakayod na tricycle kun sinda tinutugotan kan mga lokal na gobierno sa saindang franquicia na kakabali sa saindang ruta iyo an national road.

Si Provincial Director Melody Relucio kan Department of Interior and Local Government (DILG) sa Camarines Sur nagpahayag kinakaipuhan sanang magpanday nin regulatory measure para sa marikas na solusyon sa tahaw kan direktiva kan saindang opisina central na dapat estrikto nang iimplementar kan LGUs an pagbawal sa mga nagkakayog na tricycle sa national highway.

Kun an ordinansa an franquicia puedeng magruta sa national road puedeng enmiendahan kan sanggunian bayan alagad puedeng igwang ‘exemption’ alagad kaipuhan sana na ma-regulate an ruta kan tricycle, sabi pa kan DILG officer.

An direktiva kan DILG base sa mga pinapaluwas na datus kan Philippine National Police asin Land Transportation Office na halangkaw an caso kan nagiging causa nin mga aksidente sa national highway iyo an tricycle.

Sinabi pa ni Relucion dapat magcrear nin task force an mga lokal na gobierno nganing adalan an pag-isyu nin franquicia, ini iyo an maadal kan ruta asin plano nganing maprotehiran an pagkayog huli ta delicado sinda sa mga aksidente sa national highway.

Bako lang sa proteksyon kan mga tsuper maging sa ridding public sagcod na dapat linawon an policia sa mga pinagbabawal na tinampo.

Maging si Regional Director Noreen Lutey kan LTO enot nang nagpahayag sa Bicol Mail na igwang mga ordinansa an LGU na tinutugotan an tricycle kabali sa saindang ruta an national highway.

An madaling solusyon digdi enmiendahan an ordinansa kan sanggunian bayan, sabi pa kan LTO.