LGUs mayong dok sa hayop

Pinapasan ngonian kan National Meat Inspection Service (NMIS) sa Bicol an problema kan mga lokal na gobierno sa kawaran nin sadiring doktor sa hayop o municipal veterinarian asin meat inspector sa tahaw kan naglalakop na virus sa hayop na iyo an African swine fever.

Sa Camarines Sur sana labi sa veinteng LGUs an mayong municipal vet maging meat inspector afuera pa kaini mayong sadiring slaughter house.

Si enot na bungkaras kan ASF sa Bombon, CamSur pigsusulo kan opisina ni Director Dr. Alex Templonuevo mala ngani, ipinahayag kaini cada treinta minutos sagcod alas dos nin maagahon igwa pang nag-aapod sa saiyang telepono.

Si Gobernador Migz Villafuerte nagpaluwas executive order na nagmamando sa mga LGUs na dapat maging aktivo an saindang Emergency Operation Center contra sa ASF orog na si mayong mga meat inspector asin municipal vet.

Nag-ulakit na an ASF sa mga ataman na hayop sa mga barangay kan Sta .Salud, San Roque, Balungay gabos kan banwaan nin Calabanga, Camarines Sur asin naglalakop pa sa ibang barangay digdi sagcod na nagbalyo na sa Magarao.

Kinumfirmar ni Calabanga Mayor Eduardo Severo na igwa nang ASF sa labi nang treinta ataman na orig asin nagdudugang pa an nagagadan.

Sa press conference na ginibo sa Avenue Plaza kan nakaaging Juevez na pinaapod ni Director Rodel Tornilla kan Department of Agriculture sa Bicol, pigbuyagyag pa ni Templonuevo na antes nagbungkaras an ASF sa mga barangay kan Bombon, an mga residentes digdi nagbabakal kan karning hayop dawa dai ninda aram kun ini delicado sa salud.

Sa Magarao, CamSur kataid na banwaan nin Bombon, ipinahayag na igwa naman nagadan na ataman na orig huli sa ASF.

Sinabi ni Municipal Agriculturist Officer Anicia Mancita kan LGU Magarao na mayong item para sa municipal vet sa saindang banwaan an dahilan kulang an fondo kan LGU.

Sa ngonian estricto nang pig-iimplementar an lockeddown sa magkataid na banwaan kan Bombon asin Calabanga mantang kabali sa pigpapasunod an pagbawal kan pagbuna kan hayop asin pagtienda sa mercado.

Sinabi kan NMIS, kun mapabunon orig kun iluluwas sa mga banwaan na ini dapat igwang documento sa pagtransportar na negativo sa ASF asin puedeng darahon sa Ciudad nin Naga huli ta yaon digdi an pinakaharani asin accredited na double A slaughter house.

Segun pa ki Templonuevo na igwang tolong klaseng acreditadong slaughter house na kinababalihan nin Single A – an produkto para sana sa saindang lokalidad an circulasyon.

Pag-double A – arog sa Ciudades kan Naga, Iriga, Ligao, Legazpi asin Sorsogon – an karne o produkto puedeng iluwas sa provincia o pagtaraid na municipalidades asin rehiyon.

Pag- triple A –puedeng consumo pa sa lokal asin international na mercado.

Puon na magkaigwa nin ASF kan Hulyo 2019, an Bicol Regional Quick Response Team activo na an grupo base sa direktiva ni DA Secretary William Dar.