LRay nakasakdo nin P5-B na pork barrel

Kun controvercial sa ibang mga legislador an P5 bilyones na pork barrel ni Diputado LRay Villafuerte alagad dakulang bagay an bilyones na fondo sa iimplementar na mga proyecto sa segundo distrito kan Camarines Sur.

Ini an reaksyon ni Vocal Romulo Hernandez kan segundo distrito kan Camarines Sur kan makaulay kan Bicol Mail kasunod kan pigbuyagyag kan ibang mga congresista sa Camara-Baja na cuestionable sa sainda an bilyones peso na pork barrel kan representante hali segundo distrito.

An buot sabihon kaini, dai nagpapabaya si Villafuerte na makakua nin dakulang fondo para man sana sa proyecto kan saiyang congressional district, sabi pa ni Hernandez.

Nakakasakdo siya nin dakulang fondo mantang iyo an vice chairman for finance kan Committee on Appropriation.

Nabuyagyag pa an mga pork insertions kan ibang congresista sa tahaw kan posibleng kudeta contra ki House Speaker Alan Peter Cayetano na kaalyado ni Villafuerte sa Nationalista Party (NP).

Napag-araman kan vokal kan segundo distrito na kabali sa darakulang proyecto na iimplementar sa distrito kan congresista iyo an mga paconcretong tinampo, construksyon nin tulay, multipurpose building, school building asin dakul pang iba na kukunanon sa P5-B na fondo sa 2020 national budget.

Si Hernandez, miembro kan Committee on Appropriation sa junta provincial kan Camarines Sur nagsabi na igwang pigtagamang P150 hasta P200 milyon na fondo hali sa P3.4 bilyon na 2020 annual budget kan provincia para sa counterpart sa icoconstruhir na iconic Provincial Capitol.

Maabot sa P500 milyon an ipapatindog na iconic capitol alagad an kulang na fondo hahagadon sa gobierno nasyonal.

Napag-araman pa an gabos na mga congresista igwang P100 milyon na minimum na fondo para sa saindang pet projects na kabali sa P4.1 trilyon na national budget ngonian na taon. (DPAureus)