Reg’l coordinators kan PACC dai uukagon

Mantenido kan mga regional coordinator kan Presidential Anti-Corruption Commission (PACC) sa Bicol asin sa iba pang rehiyon an saindang posisyon mantang mayo pa sa planong ukagon an saindang destino ni PACC Chairman Dante Jimenez.

Ini matapos tukahan ni Presidente Rodrigo R. Duterte si Jimenez komo co-chairman kan Inter-Agency Committee (ICAD) karibay ni Bise Presidente Leni Robredo na nag-tolong semana sana sa anti-drug war.

Sinabi ni Tommy Lee, regional coordinator kan PACC Bicol na mantenido man giraray ni Jimenez an saiyang posisyon sa Presidential Anti-Corruption Commission alagad tinawan sana siya nin dagdag na trabajo ni Duterte.

Nin huli kaini, dai man mangyayari an ano man na pag-ukag kan presenting destino ninda asin posisyon. Sinabi ni Jimenez sa miembros kan media na aadalan niya an winalat na report asin recomendasyon na winalat ni Bise Presidente Robredo sa halipot niyang aldaw na trabajo sa ICAD.

Si Robredo pignombrahan ni Presidente Duterte sa sinambit na posisyon alagad hinaklas man sana na dai ngani nagtolong semana sa trabajo sa anti-drug war.

Ipinahayag pa kan bagong co-chairman kan ICAD na mayo man nin problema sa posibilidad kun puedeng basehan an report ni VP Robredo kun igwa na siyang kopya.

An trabajo sa ICAD sa campanya laban sa droga mayo man nin pagbabago sa saiyang presenting pugol na puesto sa PACC na nakatutok sa campanya contra sa kurapsyon, sabi pa ni Jimenez.

Nagtutubod siya na kaipuhan na mas maging higot an trabajo kan law enforcement agencies asin iba pang ahencia kan gobierno na envuelto sa pagtabang laban sa ilegal na droga.

Dinagdag pa ni Jimenez dawa igwa siyang trabajo sa anti-drug war alagad an campanya laban sa kurpasyon saiyang ipapadagos. (dpa)