STL sa CSur sasabayan kan jueteng
Tarpaulin na nagcocontra sa pagbuelta kan STL pinako sa mga puon nin kahoy sa Ciudad nin Naga asin sa iba pang mga banwaan sa CSur, pigtutubodan ginastosan kan mga nasa likod na ipadagos an operasyon kan jueteng sa provincia.
Nagsikad na an operasyon kan Small Town Lottery (STL) sa Camarines Sur puon kan Marso 1 alagad posibleng gibohon naman na prontera kan ibang personalidad na envuelto sa ilegal na sugal na jueteng.
Alagad nagpatanid an Philippine Charity Sweeptakes Office (PCSO) na igwang pinapasunod na safeguard an STL operator sa arin man na grupo na masabay sa magluluwas na resulta kan bola aroaldaw.
Kabali digdi na an saindang kolektor igwa IDs, oniporme alagad si dai nakasulot nin oniporme na prontera kan jueteng dadakopon kan awtoridad.
Si mapasaway na correador na nagsasabay sa pagkolecta sa jueteng asin taya sa STL ciertong hahalion kan operator.
Si Jobet Ramos, Branch Manager kan PCSO sa Camarines Sur nagpahayag sa entrevista kan Bicol Mail na tiwala sinda ki PNP Chief Director General Archie Gambo sa higot na campanya contra sa ano man na operasyon kan ilegal na sugal na jueteng.
An jueteng sa Camarines Sur nabuhay kan Deciembre 2019 asin naglawig sana kan ika-duwang semana kan Febrero 2020 matapos magpaluwas nin direktiva si Gamboa na dapat pundohon an operasyon kan jueteng maging iba pang klaseng ilegal na sugal.
Sinabi pa ni Ramos na natawan liwat nin franquicia an Evenchance Gaming Corporation na iyo an mapadalagan kan STL sa Camarines Sur matapos makabayad sinda kan milyones peso na kakulangan sa pagbayad kan mga dapat remiso sa PCSO kan sinda nagpapadagos pa kan operasyon sa CamSur.
Saiyang sinabi enot nakabayad an Evenchance kan Deciembre 2019 nin cantidad P1.6 milyon asin P200 milyon kan Febrero 2020 asin P50 milyon na cash bond sagcod na inaprobaran kan saindang central office an franquicia.
Sinabi pa kan PCSO an LGU igwa man nin kahirasan na .5 por ciento hali sa dating 5 por ciento hali sa ingreso kan STL mantang igwa man makukua an PNP alagad an national office na iyo an matao kan kahirasan.
Sinabi pa ni Ramos na kun makua nin mayors permit an STL operator iyan bilang cortecia alagad kun sayuman kan jefe ejecutivo puedeng magpadagos an operasyon mantang igwa sinda nin permiso o franquicia hali sa PCSO.
An Branch Office kan PCSO sa Ciudad nin Naga narecibe na an kopya sa franquicia kan Evenchance hali sa saindang opisina central asin nagpuon na kan saindang pagpataya kan Marso 1.
Si mga dating kolektor nag-ataman nalang nin orig kan mapundo an STL operation kan Hulyo 2019 alagad huli kan African swine fever nagpundo na kan saindang backyard hog raiser envez nagpadagos bilang correador sa game of chance.