Actividades sa manga escuelahan sa elementarya babawasan-DepEd

Pili, Camarines Sur. Babawasan na kan Departmento de Edukasyon (DepEd) Bicol an mga extra curriculum activities kan mga aki sa elementarya nganing paurogon an pagbasa asin magkaigwa nin specialized training program na matao nin atensyon sa pagbasa kan mga aki.

Ini an saro sa solusyon kan DepEd kasunod kan pinaluwas na datus asin sa nagluwas na bareta sa peryodico nasyonal na nagpapaheling na setenta mil na mga estudiantes sa elementarya sa Bicol an ‘’nonreaders’’.

Si Grace Rabelas, education supervisor for curriculum and learning division kan DepEd Bicol nagpahayag kaini kan siya maging bisita sa sesyon regular kan junta provincial kan nakaaging semana na nagrepresentar ki regional director Guilbert Sadsad.

Gusto nang sarahan ni Sadsad an isyu asin sabi kaini ‘lets move on’.

Sinabi pa ni Rabelas na bakong valido an pinaluwas na datus sa peryodico nasyonal na ribo-ribong estudiantes sa Bicol an dai nakakabasa. An isyung ini padagos pa nindang pigserserne an datus nganing ipatama.

Si Vocal James Jaucian kan segundo distrito kan Camarines Sur nagpahayag man na dapat an mga magurang magtabang sa pagbasa kan mga asin dai lang maglaom sa paratukdo asin kaipuhan an saindang participasyon.

Sa mga pahayag man ni Vocal Emmanuel Noble, chairman kan committee on education sa junta provincial sinabi kaini na mapasar sinda nin resolucion nganing hagadon sa nagsurat kan bareta sa peryodo nasyonal na mag-apologized huli ta dakulang epekto ni sa imahen kan mga paratukdo kan DepEd Bicol.

Sa Ciudad nin Naga, dai pa naluwas an articulo sa peryodico nasyonal igwa nang pig-iimplementar na specialized training program nganing mahasa an pagbasa kan mga estudiantes.

Si Dr. Manny de Guzman, City School Division Supt. kan DepEd sa Ciudad nin Naga nagpahayag man na bulan pa nin Oktubre 2019 saiyang pig-iimplementar an programa mala ngani sa 28 mga elementary school digdi doce na an nagpapadagos kan programa sa pagbasa kan mga aki sa elementarya. (dpa)