Aniversaryo kan RTL kinundenar

Nagcelebrar an Departamento de Agricultura kan premirong aniversayo kan Rice Tariffication Law (RTL) – (RA 11203) kan Marso 5, 2020 alagad an sektor nin paraoma nagcocondenar kan ley mantang mayong pakinabang sa sainda envez naapektuhan sana an kabuhayan kan mga paraoma huli ta iyo an nagpabaksak kan presyo sa paroy.

An Kilusang Magbubukid ng Bicol (KMB) liwat hinahagad sa administrasyon ni Presidente Rodrigo Duterte na ibasura na RTL huli ta dai man ini nakatabang sa saindang sektor mantang mas nagparuro sa pagbuhay kan mga familia nin paraoma.

An KMB na pinamamayohan kan saindang Presidente na si Bert Author nag-rally sa opisina rehiyonal kan DA sa Pili, Camarines Sur kaibana an grupo kan Amihan-Bicol, Karapatan Bicol asin Bantay Bigas sa Bicol na nagkukurahaw na dapat ibasura na an Rice Tariffication Law mantang mas lalong nagpatios sa saindang sektor.

Pig-atubang sinda kan mga opisyales kan DA Bicol sa sarong halipot na oras na diyalogo asin an aviso sa sainda pakusogon an saindang organisasyon nganing matabangan sa paagi kan P10-bilyong Rice Competitiveness Enhancement Funds.

‘’Mistulang kamatayan na ipinataw sa lokal na industriya ng bigas at sa kabuhayan ng 75 % ng populasyon ng Bicol na mga magsasaka’’, sabi pa ni Author.

Sinabi pa kan mag-epekto an ley iyo an pagbagsak kan presyo kan paroy mantang pigbabarat kan mga kumprador an presyo sa mga baryo. Nagdadalagan an presyo sa Php7 hasta Php12 an average na presyo puon kan nagtalikod na taon mala ngani sa ngonian nakapako na sa Php12.

Inaabot nin Php30 mil hasta Php40 mil an ginagastos sa sarong hektarya paroyan asin may minsan iaabot pa nin bagyo.

An natabangan kan RA 11203 iyo an rice traders huli ta nakakapabakal nin halangkaw na presyo kan bagas puon sa Php36 hasta Php5 cada kilo sa mga mercado.

Saindang hinahagad na (1) dapat bakalon an saindang paroy kan mga negosyante asin NFA na dai mababa sa Php20/kilo na dapat mayong rekisitos. (2) magtaong cash advance (bakong pautang) sa cantidad na Php25,000 sa mga saradit na paraoma asin ayuda finansyal. (3) Magtabang an DA na ma-establiser an presyo kan bagas sa mercado sa abot na kayang presyo (P25-P25/kilo). (4) Paurogon an kakayahan kan NFA sa pagbakal nin paroy sa mga paraoma na dai hagadan nin kadakul na rekisitos. (5) Magbugtak nin mga NFA satellite buying station nganing pakusogon an industriya nin paroy nganing mas pacil paraoma asin harani pa sa paroyan. Asin (6) Suportaran kan DA asin NFA an punsyon para sa pag-asenso sa industriya nin paroy nganing establisado an presyo kan bagas. (dpa)