NAGVIAJE HALE SA JERUSALEM, ISRAEL: 98 peregrino nagpa cuarentina
An City Health Office (CHO) nagkumfirmar kasoodma na 98 sa 200 na mga peregrino hale sa Jerusalem, Isareal an nagpuruli sa Ciudad nin Naga kan nakaaging Sabado asin Domingo, (Marso 7, 8) saindang inabisohan na mag-self quarantine sa laog nin katorce diyas.
An Israel kabale sa mga nasyones na apektado na kan coronavirus disease (COVID 19) na mandato kan Department of Health (DOH) an arin man na viajero hali sa nasyon na apektado kan virus dapat magsunod sa self-quarantine. Si Dr. Vito Borja, City Health Officer kan lokal na gobierno kan Ciudad nin Naga nagpahayag sa Bicol Mail na igwa na siyang listahan kan 172 na peregrino hale sa simbahan asin an masunod na batch nakatalaan mag-abot ngonian na aldaw mantang igwa pang ibang 30 na mayo siyang listahan huli ta yaon sa travel agency.
Sinabi kan City Health Officer mantang naka-face mask siya saiyang kinaulay an grupo nganing obligaron na magsunod sa pigmamando kan DOH sa self quarantine. An iba sa sainda bakong taga ciudad kabale man sa saiyang pig-abishon.
Anas man nasa marhay an salud afuera kan iba na igwang sipon, sabi pa kan CHO.
Aroaldaw sinda pigkukuanan nin temperatura kan Barangay Emergency Response Team alagad oras na igwa nang sintomas kaipuhan i-report sa saiyang opisina nganing darahon sa hospital.
Nagpatanid man an City Hall na si dai masunod sa self quarantine asin maheling na naglalakawlakaw sa centro puedeng arestarong asin maatubang nin penalidad.
Si Arsobispo Rolando Tria Tirona kan Caceres, kabale sa grupo asin iba pang kapadian asin madre. Sa pig-post sa face book ni Tirona nag-apelo na ini sa iba pang kapadian asin mga nagviaje hali sa Jerusalem na dapat mag-self quarantine asin saiyang inako na tolos siyang nagsunod sa pigmamando kan gobierno.
Sinabi man ni Padre Louie Occiano, director kan Caceres Commission on Communication (CCOM) na nasa marhay an salud kan arsobispo mantang si ibang kapadian binawalan na mag-misa asin itao na muna sa ibang mga pade.
An mga peregrino nagviaje sa Isarel nganing mag-atendir sa blessing asin unveiling kan AMA NIAMO ceramic plaque sa sarong simbahan na harani sa kueba na pigsasabing si Jesukristo nagtukdo digdi kan pangadion kan kagurangnan sa saiyang mga apostolada. (dpa)