9th ID dai makikiaram sa hiro kan CPP vs Covid- 19

An 9th Infantry Division kan Philippine Army sa Bicol na may base sa Camp Elias Angeles, Pili, Camarines Sur nagpahayag na tama lang an ginigibo kan Communist Party of the Philippines (CPP) na an tropa kan NPA an siribot man sa paglaban sa coronavirus disease (COVID-19) alagad an fuersa militar mantenido na nakaalerto sa mga kalaban kan gobierno.

Mas marhay kun dagos na sindang magsuko sa gobierno sa tahaw kan nangyayaring ngonian na krisis sa virus.

Ini an mga pahayag ni Army Capt John Paul Belleza an opisyal na parataram kan 9th ID sa Bicol alagad nakaalerto man giraray an saindang tropa sa pagdepensa sa ano man na posibleng paghasok nin kariribokan kan kalaban kan gobierno.

Dai man kami nakikiaram kun totoo na naghihiro an kumunistang grupo sa sainda man na lakdang contra sa COVID-19.

Sa pinaluwas na press statement ni Jose Maria Sison kagfundar kan CPP an rebeldeng grupo an padagos man sa paghiro asin kampanya laban sa ‘‘deadly virus’’ asin mayo sindang panahon na maghasok nin kariribokan contra sa tropa kan gobierno mantang nag-oobserbar sinda kan unilateral ceasefire.

An CPP, NPA asin National Democratic Front of the Philippines an nagtatarabang sa kampanya laban sa virus, sabi pa sa press statement ni Sison na yaon ngonian nakabase sa Utrecht sa The Netherlands.

Si Presidente Rodrigo Duterte nagdeclara nin unilateral ceasefire puon kan Marso 19 hasta Abril 15 matapos ipasa-irarum sa ‘‘enhanced community quarantine’’ nganing labanan an Covid-19.

Sinabi pa kan 9th ID na sa tahaw kan paglangkaw kan caso sa Covid-19 mayong nangyaring encuentro an tropa kan militar asin armadong rebeldeng NPA.

Sa ngonian an mga soldados kan 9th ID an nagtatabang sa mga check point kan PNP na pig-establisher kan mga LGUs nganing ma-monitor an mga naglalaog na dayuhan hali sa ibang lugar orog na sa mga provincia na igwa nang mga positivo sa Covid-19.