Opisina kan LTO sarado

Nakakandado sagcod sa ngonian an District Office kan Land Transportation Office (LTO) sa Ciudad nin Naga maging sa iba pang mga distrito huli kan nagpapadagos na enhanced community quarantine sa kampanya kan gobierno nganing malikayan an pagkuriyat kan coronavirus disease (Covid-19).

Huring nagbukas an district office kan Marso 16 alagad kan sunod na aldaw nagdesisyon magpaluwas nin direktiva si regional director Franciso Ranches kan LTO Bicol bilang pagsunod sa enhanced community quarantine ni Presidente Rodrigo Duterte huli kan Covid-19.

Kan igwa pang transaksyon an saindang an opisina estrictong pig-iimplementar an ‘‘social distancing’’ bilang paglikay sa Covid-19.

Sinabi ni Law Enforcer Eric Torrecampo na naghahalat sana sinda nin direktiva kun nuarin kinakaipuhan na magbalik sa normal an transaksyon sa saindang opisina.

Alagad piglinaw kan LTO na si mga nagpaso na si licencia sa pagmanijo na dai makaka-renew asin car registration dai maimponer nin multa asin ano man na penalidad an saindang ahencia.

Mantang sarado an saindang opisina kabale sinda sa mga nagmamantenir kan check point sa Covid-19 kan PNP bilang augmentation force. (dpa)

‘‘SOCIAL DISTANCING’’ estrictong pig-iimplementar kan LTO District Office sa Ciudad nin Naga sa mga ma-renew nin licencia sa pagmanijo asin car registration alagad huli sa paglikay sa Covid-19 dagos nang kinandadohan an opisina. (dpa)