Relokasyon kan mga poste kan Casureco II, pinapundo

Liwat naman maabala an relokasyon kan mga electrical post kan Camarines Sur II Electric Cooperative (Casureco II) mantang nagpapadagos pa an krisis sa coronavirus disease (Covid-19) asin apektado an trabajador kan lockdown na pig-iimplementar kan mga lokal na gobierno.

Sinabi ni Rinner Bucay, opisyal na parataram kan Casureco II an saindang contratista dai na muna pinaralaog an mga trabajador huli kan Enhanced Community Quarantine (ECQ) sa Luzon.

Dati nang naabala an patrabajo mientras na an ibang babalyohan kan mga poste makakalaog sa pribadong propriedad asin an iba dai nagcocooperar.

Afuera pa kaini, abala man an pagpaluwas nin fondo kan Department of Public Works and Highways (DPWH), kasunod kan joint memorandum sa pag-ultanan kan ahencia kan Department of Energy na igwang obligasyon an obras publika na bayadan an relokasyon kan mga poste nin mga cooperativa nin electricidad.

An DPWH nag-iimplementar kan road widening project alagad kaipuhan halion an ulang na mga estraktura kabale na an mga poste.

Mabuelta an patrabajo kan contratista pakatapos kan ECQ.