Road clearing operations sinuspende kan DILG

Sagcod na mayo pang direktiva an opisina central kan Department of Interior and Local Government (DILG) na ipadagos an road clearing operations kan mga lokal na gobierno magpapadagos ining suspendido kasunod kan pig-iimplementar na Enhanced Community Quarantine (ECQ) sa Luzon huli kan casong coronavirus disease (Covid-19).

Si Provincial Director Melody Relucio kan DILG Camarines Sur nagsabi na nagpaluwas nin memorandum an saindang ahencia nasyonal na igilid muna an saindang pag-evaluate sa mga road clearing operations mantang apektado an Luzon kan krisis sa virus na padagos naglalangkaw an caso.

Kun mayong problema sa ‘‘deadly virus’’ an nasyon dapat an mga LGUs nakatapos na kan saindang paghale kan mga ulang na estruktura sa road right of way asin an DILG yaon na sa ginigibong pag-evaluar kun nagsusunod sa direktiva ni Secretaryo Eduardo Año.

Sa ika-duwang hurnado kan road clearing operations kabale na sa pigmamandohan an mga opisyales lokal na dapat haleon sa mga tinampo o propriedad kan gobierno an mga ulang na estraktura nganing malinig asin buelo an dalagan kan vehiculos.

Sa ngonian an pigtatawan nin prioridad kan DILG iyo an pag-monitor kan mga LGUs asin Barangay sa kun saindang na-iimplementar an guidelines sa ECQ.

Gabos na LGUs asin Philippine National Police (PNP) asin mga Municipal Disaster Risk Reduction Management Council (MDRRMC) nakatutuk sa ngonian sa estrictong pagpasunod kan ECQ nganing maibitaran an pagkalat kan Covid-19.

Sinabi kan DILG ano man na pag-abuso asin pagbalga sa check point kan mga awtoridad isombong sa saindang ahencia alagad kaipuhan mag-agi man giraray sa due process. (dpa)