NFA CSUR KULANG NA NIN STOCK: City Hall nagbabakal na nin commercial rice

Napiritan nang magbakal nin diez mil na sakong commercial rice an lokal na gobierno kan Ciudad nin Naga nin huli sa kakulangan nin stock nin bagas sa National Food Authority (NFA) sa Palestina, Pili, Camarines Sur.

Ini an kumfirmasyon ni Alcalde Nelson Legacion sa ginibong on line virtual press conference mantang nakapaut an pangako kan NFA para sa premirong semana ngonian na Abril asin dai na makakahalat an tulak kan mga residentes kan veinte sieteng barangay kan ciudad sa tahaw kan nagpapadagos na estrictong implementasyon sa Enhance Community Quarantine.

Aprobado sa paagi nin resolucion kan Sangguniang Panlungsod na nag-aawtorisar sa jefe ejecutivo na magbakal nin suplay nin bagas sa pribadong negosyante mala ngani naka-deliver na nin diez mil na sakong bagas alagad an dugang na suplay magdedepende sa aktual na pagkua nin datus sa ginigibong household intake survey kan City Social Welfare and Development Office.

Afuera kan enot na pigtaong ayuda kan mga barangay cada harong an City Hall igwa nang naenot na tig-sarampulong kilong bagas lambang familia.

An City Hall igwa nang enot na diez mil na sakong bagas hali sa NFA alagad igwa pa sindang ika-tolong pighahalat na inisyal na 15 mil na purchase order alagad sinabi ni NFA Provincial Manager Alan Sabaybay dai pa sinda makatao mantang an presenting pigmomolino nakatagama sa iba pang mga LGUs.

Nagtuga naman an NFA para sa enot na semana ngonian na bulan alagad binawi sa ika-tolong semana naman. Nin huli kaini, napiritan an City Hall na magkua nan in suplay nin bagas sa pribadong negosyante. An NFA Camarines Sur nag-aasa pa kan suplay nin bagas hali sa rehiyon IV-A.

Maging an opisina rehiyonal kan NFA Bicol nagkukulang naman nin stock nin bagas nin huli kan ribo-ribong purchase order kan LGUs asin naghahalat kan dugang na suplay sa rehiyon tres (Central Luzon) asin sa rehiyon cuatro (Calabarzon). (dpa)