PAGLIKAY SA COVID-19: Hospital sa Naga naka-lockdown
Idinamay na kan lokal na gobierno kan Ciudad nin Naga an pag-lockdown kan Infirmary Hospital sa Barangay Carolina matapos makumfirmar na an sarong empleado digdi aki kan sarong 66 años na lalaki na binawian nin buhay huli sa coronavirus disease.
Nagdesisyon an City Hall sa pamamayo ni Alcalde Nelson Legacion na kandadohan an hospital nganing makalikay sa ano man na posibleng virus mantang an empleado na aki kan nagadan sa casong Covid 19 piglaog na sa katorce diyas na Person Under Investigation (PUM) asin pagiriba kan familiang pasyente.
Infirmary Hospital sa Barangay Carolina nakakandado. (dpa)
Alagad sa pinakahuring pinaluwas na anuncio ni Legacion tolo sa walong parientes kan pasyante nag-negativo sa Covid 19 base sa pinadarang laboratory result kan DOH.
Si Punong Barangay Eufresina Manguiat kan Brgy. Carolina nagpahayag na dakulang tabang sa upper barangay an hospital dawa para sa menor sanang mga pasyente asin nakakatabang pa sa ibang residentes kan Calabanga, Camarines Sur na digdi na nagdadayo.
Alagad mayo sindang magiginibo nin huli ta an aksyon kan City Hall para sa proteksyon kan mga empleados maging pasyente kan hospital.
Sa ngonian mayo na munang pasyente kun igwa man si mga empleado na kabali sa PUM.
An ika-duwang nagpositivo sa Covid 19 sa Ciudad nin Naga na binawian nin buhay taga Brgy. Calauag, sarong 66 años na lalaki na mayong travel history asin kinumfirmar kan DOH Bicol ki Alcalde Legacion.
Sa on line announcement kan jefe ejecutivo, sinabi kaini kan Abril 2, an pasyente nagreclamo na kalinturado asin nadidificilan na makahangos. Alas 10:00 nin banggui, dinara siya sa pribadong hospital alagad matanga kan kaparejong petsa binalyo sa Bicol Medical Center na digdi na siya binawian nin buhay na nakuanan man siya nin swab test.
Alagad ala 1:00 nin aga kan Abril 3, an pasyente binawian nin buhay na tolos pig-cremate sa aviso kan City Health Officer, Dr. Butch Borja.
An gabos na persona na nagkaigwa nin primary asin secondary contact sa pasyente gabos pigpasa-irarum sa PUM.
Kasunod kan kumfirmasyon kan DOH sa ika-duwang casong Covid 19 sa Naga, tolos man nagsugo si Legacion na iimplementar an lockdown an brgy. Calauag huli ta taga digdi an pasyente.
Si primerong caso sa Covid 19 sa Naga na 30 años na babae asin taga Sister Therese kan Brgy. Concepcion Pequeña, kinumfirmar na kan DOH na narahay na asin nakaluwas na sa Bicol Medical Center. (dpa)