Quarantina
Bako lang problema kan Pilipinas kundi problema kan kinaban an inaatubang niyato ngonyan.
Suba ka kaiyan tolong semana na kitang naka-quarintina an Luzon, pigpalawig pa abot Abril 30 an Enhanced Community Quarantine ta embes na nagdidikit nagdadakol lugod an nagpo-positivo sa Covid-19, pati an bilang kan nagkakagaradan.
Sa enterong kinaban nangengenot na an Amerika na may pinaka-dakol na may helang kan Covid-19 pati an mga gadan, nag-iikaduwa an Italya, sunod an Espanya, sunod an Germany, an Tsina ika-lima na sana asin 190ng ibang nasyones kan kinaban an apektado na.
Sa Asia-Pacific region an Pilipinas nag-iikaduwa sa Malaysia sa may pinakadakol na bilang ning nang positivo asin nagkagaradan huli sa Covid-19.
Dati sa Bicol lalo na sa Naga asin Camarines Sur igwa sana nin mga persons under monitoring (PUM) saka persons under Investigation (PUI) asin nagkakapirang positive duman sa Albay.
Mamunduon ta ngonyan na semana igwa nin binawian nin buhay dahil sa Covid-19 mismo sa ciudad nin Naga dyan sa barangay Calauag.
Sabi an biktima mayong travel history maguin sa abroad o sa Manila, yaon lang dyan naglalayaw-layaw sa barangay may kapot pa nganing quaratine pass na pigtao personalmente kan Kapitana kan Calauag ta ini amigo niya antes magadan.
Lockdown o laom na an nagkakapirang kalye kan barangay pati an lugar ni Kapitana sa Filoville Subdivision kaya lang an bareta sagkod ngonyan luwas laog pa an mga tao delikado pa an paoro- orolakit.
Semana Santa na ngonyan pero mayong aktibidades an simbahang Catolico arog kan prosesyon, misa sa laog o luwas kan simbahan, Visita Iglesia, pagtuntun durante kan Paskong Pagkabuhay asin iba pang pagtiripon-tipon an tutugutan kan gobyerno.
Primero ini sa estorya kan Pilipinas sa laog nin labing 70 anyos poon kan World War II na dai ma-observar an satong Catolicong nasyon kan Semana Santa.
An coronavirus disease pandemic daog pa an giyera mundial ta dai magamit nin mga armas, machine gun, bomba, granada maski atomic bomb sa pakipag-giyera kan kinaban laban sa dai naheheling na Covid-19.
An virus na pig-aapod na iyo an may dara kan nakakadagan na helang nakadukot sa tao na pwedeng mag-olakit sa kapwa tao kun kaya dapat i-quarintina an mga tao lalo na sa mga dakulang populasyon arog kan Metro Manila, Naga, lalo na duman sa Roma sa Italya asin sa New York sa Amerika.
An problema lang dahil sa globalisasyon asin pankinaban na turismo sige an hiriro kan mga tao, sige an beriyahe kaya sige man an lakop kan helang na nakakagadan.
Digdi satuya ta primero ining mangyari ta an mga tao dai nagtutubod sa quarintina o lockdown tangarig sinda mag-permi sana sa laog kan harong nganing dai maka-olakit asin dai maolakitan kan helang na nakakagadan.
Digdi sato sa Bicol an paghuna kan tao may Covid-19 sana sa Tsina, sa Europa, o sa Amerika asin sa Kamaynilaan na harayo sato. Dai ninda aram na an virus dara kan tao na nagbibiyahe asin kan aire o duros na naglalayog kan enot sige sanang karalaw-lakaw, sige an pa centro, durukutan, kun minsan magka-arakbayan pa dai nagsusunod sa pagboot sa social o physical distancing.
An kadaklan pigpro-problema an trabaho asin an makakakan bako an paglikay sa helang asin kagadanan.
Kadaklan kan mga Pilipino matatagas an payo, pilosopo, asin tumang na marhay sa gobyerno. Hinahaluan pa nin politika kun maatom ka sa social media an mga anti-Duterte mayong nang ibang sinabi kundi an magtatsar, magtuyaw asin magreklamo sa gobyerno. Gusto pa nindang padurulakon si Presidente Digong asin si VP Leni.
An iba ngani gustong pabagsakon an gobyerno ni Duterte sa tahaw kan crisis na ini. An problema kan tao bako lang kan mga Pilipino atang abang tatagas kan payo, mayong disiplina o saka grabeng pagka-materyoso (mahilig sa kuwarta asin material na bagay).
Lingaw na ngani kitang magpangadie asin maghagad nin tabang sa Mahal na Diyos.
An pigdiyo-Diyos kaya ngonyan iyo an mga kakamping politiko asin kuwarta na sa panahon na ini mayo na nin kamugtakan.
Kun dai kita magbago tibaad magunaw na an mundo.