HULI KAN RTL, COVID-19: P10k ayuda kan DA sa manga paraoma

Pili, Camarines Sur – Abot sa total na diez mil pesos cada paraoma nin paroy an makakarecibe nin ayuda finansyal hale sa Department of Agriculture (DA) na apektado kan Enhanced Community Quarantine (ECQ) asin si nahuring subsidiya finansyal na apektado kan pagbagsak kan presyo nin paroy kan nakaaging taon 2019 kasunod kan implementasyon kan Rice Tarrification Law (RTL).

Si regional information officer Emily Bordado kan DA Bicol nagpahayag sa entrevista kan Bicol Mail na sa ngonian pigpupunan nang idistribuer an enot na P5,000 para sa mga apektado kan pagbagsak kan presyo kan paroy kan nakaaging aranihan kan 2019 alagad calificado digdi si may umahan nin sagcod sa sarong hektarya pababa.

Igwang total na 89,884 benipisyaryong mga paraoma hale sa provincias kan Camarines Sur, Albay, Sorsogon asin Masbate alagad dai kabale an Camarines Norte asin Catanduanes huli ta dikit digdi an rice farmers asin igwa man sindang ibang biyaya hale sa ahencia.

An Camarines Sur na iyo an may mahiwas na kaomahan kumpara sa tolo pang provincia igwang total na 42,017 benipisyarong paraoma.

Sinabi pa kan DA Bicol an mga calificadong mga paraoma dapat rehistrado sa Registry System for Basic Sector in Agriculture lambang municipyo alagad digdi sa Camarines Sur nagagi pa sa pinal na validation kan Capitolyo Provincial sagcod inaprobaran kan DA asin an subsidiya finansyal makukubra sa Land Bank of the Philippines.

An fondo hale sa Rice Tarrification Law asin pinaagi sa LBP, sabi pa ni Bordado.

An ika-duwang P5,000 itatao kan DA bilang cash subsidy sa mga paraoma nin paroy bilang ayuda sa mga apektado kan ECQ.

An programang ini inaapod na Financial Subsidy to Rice Farmers (FSRF), an cinco mil pesos parte kan iniciativo kan ahencia nganing matabangan an mga paraoma na nagtatanum para sa sarong hektarya o hababa pa, na yaon sa laog kan 24 provincias na sakop kan Rice Farmers Financial Assistance (RFFA). An P3-B na FSRF fund hale sa 2020 General Appropriation Act.

An FSRF bilang interbensyon kan gobierno nganing suportaran an mga paraoma na apektado kan pinalawig na ECQ huli kan COVID-19 pandemic.

Dai paman pinaluwas kan DA kun perang mga benipisyaryo digdi sa Bicol mantang nagpapadagos pa an pagtipon kan listahan hale mga technician kan Municipal Agriculturist Office kan LGUs. (DPAureus)