Pan-aatake kan NPA kinundenar

Camp Elias Angeles, Camarines Sur. Kinundenar kan 9th Infantry Division Philippine Army an pan-aatake sa tahaw kan pagrumdum sa kinaban kan mamundong Viernes Santo sa pagkakagadan ki Jesucristo sagcod nagka-igwa nin encuentro an tropa kan gobierno mga alas 5:30 nin hapon laban sa rebeldeng New People’s Army (NPA) sa Masbate alagad mayo man pig-osip na nalugadan sa tropa kan gobierno.

Si Maj General Fernando Trinidad Commanding General kan 9th ID na may base sa Camp Elias Angeles, Brgy. San Jose, Pili, Camarines Sur namumundo sinda apesar na an gobierno asin Communist Party of the Philippine/NPA parejong nagdeclara nin unilateral ceasefire asin nakatutok an saindang tropa sa COVID- 19 pandemic alagad an rebeldeng grupo nagsinutil sa ceasefire.

Manga armas nabawi kan 2nd Infantry Battalion kan Phil. Army asin PNP sa encuentro sa Brgy. Cabas-an, Aroroy, Masbate. (9th ID)

Mismo an lider kan kumunista Jose Maria Sison nagdeclara nin untok putok asin nagpahayag pa na igwa man sindang ginigibong mga paghiro sa krisis laban sa COVID-19.

Sa narecibing report kan Division of Public Affairs (DPAO) kan 9th ID, sinabi ni Army Capt, John Paul Belleza an tropa kan 2nd Infantry Battalion (2IB) asin an Philippine National Police nagtatabang sa relief operations sa mga residentes kan Barangay Cabasan, Aroroy, Masbate kan paputokan an tropa kan gobierno kan maabot sa quince (15) armadong rebeldeng NPA.

Nin huli kaini, nagbalos man tolos an tropa kan mga soldados asin PNP contra sa armadong rebelde na inabot nin cinco minutos si pabalyohan nin putok kan mag-ibong na lado.

Sinabi pa na duwang miembros kan CPP/NPA an natalikop mientras na sarong calibre 45ng badil, duwang homemade na shotguns, sarong carbine rifle, anti-personnel mines asin mga bala kan mga nabawing armas sa lugar kan encuentro.

Sagcod sa sinusurat an baretang mayo pang impormasyon kun igwa man nalugadan sa lado kan NPA.