SA CAMARINES SUR: Congresista, et al suportado an pagpalawig kan ECQ

Suportado kan mga congresista sa Camarines Sur asin iba pang opisyales lokal an naging desisyon kan gobierno na palawigon pa an enhanced community quarantine (ECQ) sa rehiyon kan Luzon hasta sa Abril 30.


‘‘An pagpalawig kan ECQ dakulang bagay mantang padagos na pigtatawan ngonian nin prioridad kan presenting administrasyon na maresolberan an padagos na paglangkaw kan coronavirus disease (Covid- 19)’’sabi kan mga opisyal.

Si Congresista Gabby H. Bordado Jr. kan tercer distrito kan CamSur asin Assistant Minority leader sa Camara-Baja nagpahayag na an extension o pagpalawig tanganing makasiguro kita na mas maging epektibo an pagresolber kan Covid-19.

-Saiya pang sinabi na base sa pinaluwas na datus kan mga ahencia, kabale na an Departamento de Salud (DOH), kinakaipuhan pang mas mapaurog na mapababa an caso kan virus sa nasyon. ‘‘Baka nagdakul pa an tamaan kun dai kita malikay. Kulang pa man na marhay an ginigibo ta nin mga testing’’.


Sa lado ni Congresista Arnie Fuentebella kan cuarto distrito kan CamSur sa paagi kan saiyang Chief of Staff Fortunato ‘Ato’ San Jose an saindang panindugan kun ano man an sabihon kan mga experto sa desisyon sa pagpalawig kan ECQ sainda ining suportado. Sinabi pa na an mga experto suportado ini kan saindang lehislador. Igwa nang mga ginibong programa an gobierno nganing matabangan an mga apektado.

Alagad an mga lehislador nagsabi na dapat hidalion na kan DSWD an distribusyon kan Social Amelioration Program sa nadadapat na mga benipisyaryo.

Sa junta provincial kan Camarines Sur, sinabi ni Vokal Angel Naval kan tercer distrito na saiyang pinapaboran an pagpalawig kan ECQ nin huli ta sagcod sa ngonian mayo pang bulong sa delikadong Covid- 19.

Si Alcalde Madelaine Alfelor kan Ciudad nin Iriga nagsabi na pabor siya sa extension mantang mayo man ibang dapat gibohon magpenetencia nganing dai kita mag-arog sa nasyon kan Italy na marikas si paglangkaw kan caso.

Sa Sangguniang Panlungsod kan Ciudad nin Naga, si Consejal Joselito del Rosario nagpahayag na bilog an saiyang suporta sa ginigibo ngonian kan gobierno asin nadadapat lang palawigon an ECQ.


Sa San Jose, Camarines Sur, sinabi ni Consejal Audie Concina na pabor siya sa naging aksyon kan gobierno nin huli ta an problema ngonian iyo an tawo bako an gobierno na naggigibo kan gabos nganing maresolberan an virus alagad an mga tawo dakul pa an nagpapasaway dai nagsusunod sa cuarintina, dakul an dai pa disiplinado.

Magigirumduman si Presidente Rodrigo Duterte inaprobaran an recomendasyon kan Inter-Agency Task Force for the Management of Emerging Infectious Diseases (IATF-EID) na palawigon an ECQ hasta alas 11:59 nin banggui sa Abril 30. (DPAureus)