LGUs mapabulos gatas sa mga omboy

Duwang lokal na gobierno sa Camarines Sur nagpaluwas nin fondo sa pambakal nin gatas para sa omboy kan ina na nagpapasuso pa kan saindang aki sa paagi nin bottle milk feeding.

Naheling kan LGUs kan Ciudad nin Naga asin San Jose, Camarines an pangangaipo ngonian orog na si mga pobreng familia na apektado an pagbuhay ngonian na pinalawig pa an Enhanced Community Quarantine huli kan coronavirus disease (Covid -19).

Sa City Hall, pinangenotan ni Consejal Elmer Baldemoro an pagpasar nin ordinansa sa Sangguniang Panlungsod nganing magtagama nin 500 mil pesos mantang sa LGU San Jose, sinabi ni Consejal Audie Concina na nag-aprobar sinda nin pagpaluwas nin P200 mil mientras dakul ngonian na mga ina an nagpapasuso nin aki sa paagi ni bottle milk feeding.

Alagad dinagdag pa ni Baldemoro an saindang tabang sa mga omboy bako lang libreng gatas envez kabale na an libreng bitamina.

An fondo kan duwang LGUs hale sa Department of Budget and Management sa paagi kan Acta Republika 11469 o mas midmid sa apod na ‘’Bayanihan to Heal as one Act’’. An Ciudad nin Naga igwang maabot sa P57 milyon asin an LGU San Jose igwa sanang P9.9 milyon.

Nagtutubod sinda Baldemoro asin Concina na kun igwang kakayahan an saindang lokal na gobierno na pambakal nin suplay nin bagas asin maninigo man na tawan nin prioridad an mga omboy.

Sinabi pa kan Consejal kan LGU San Jose na nagpasar sinda nin resolucion na tawan nin 15 kilos nin bagas an cada familia sa saindang mga barangay.

Afuera pa kaini, matao nin sarong cavan nin bagas sa cada mga familia na dai kabale sa Social Amelioration Program kan DSWD, DOLE-CAMP, UCT asin benipisyaryo kan biyaya hale sa Department of Agriculture. Nagtagama sinda digdi nin total na Php6.4 milyon. (dpa)