Orag ni David



Haloy na kutang may libro akong naisurat dapit sa Bikol asin mga pa-consuelo ni David Dollano, sa radyo na tunay na Bikolista.

Kundi sa kaaantabay bilang radio fanatic nalingawan kong isurat sa papel aro-aldaw an mga pambihirang Bikol, hararom asin hababaw pero interesante.

Ngonyan pa lang nagpopoon akong magsurat sa papel kan mga terminolohiya na gamit niya sa radyo na dai gamit kan iba.

Namundag sa Bula (Rinconada), nagdakula sa Calabanga, nag-eskwela sa Naga asin ngonyan naka-estar sa Canaman an banwaan na pighahalean kan “standard Bikol”.

An saiyang depuntong ina sarong maestra, Batangeṅa pero an tono ni David on-air or off-air Bikolanong-bikolano mayong Calabanga o Bula accent.

An saiyang ama na propiong taga Bula, Antero Habana Dollano, dating provincial guard na pigbabansagan na Samuel Bilibit ta lakaw sanang lakaw dai naglulunad. Siya an numero unong taga-hanga ni David sa radyo. Antes siyang nagadan sa edad na 97 pirmi pa siyang nagbibisita sa estasyon na pigpro-programahan ni David. An dai aram ni Don Antero siya man an idolo kan saiyang sikat na aki sa linya nin disiplina asin pakikipag-kapwa.

Bako pa siyang broadcaster kan amay na parte kan dekada 80, sinda ni Irvin Borja an saiyang barkada mga sikat nang orador asin student lider sa UNC.

Nakanood siyang maging announcer live sa 27ng barangay kan Naga bilang operator sa sound system ni dating Kagawad Popoy Hernandez asin emcee sa mga programa asin pabayle kan grupo na dating Mayor Lut del Castillo, Vice-Mayor Pat Obias asin pag-iriba.

Annoucer na siya sa BBS-DWLV kan magkandidato siya para konsehal kan Naga pero nadaog kaiba si Jess Robredo kan 1988, nagparadiskurso na siya sa gabos na barangay kan ciudad.

An pangako niya papakapotan niya an saiyang tropeyo sa mga daraga kun siya mangana. Mala ta nadaog.

Sa linyada maski daog si David gana si Luis Ortega asin si Alfredo “an masalvar” Cabral bilang konsehales sa enot na turno ni JMR alyas pogi.

An carera ni David nagpoon sa mga side walk sa centro kan Naga bilang shine boy asin istambay sa Plaza Rizal.

Gulpi siyang namidbid na tao asin nadangog niya sainda an gabos na klaseng tataramon lalo na sa Bikol pati katarantadohan.

Napangagom niya an magayon na si Melba Chavez asin may tolong aki, duwang guapong lalaki asin sarong magayon na daraga, gabos tapos sa kolehiyo.

An pigbibiliban saiya kan saiyang mga taga-hanga iyo ta marhay siyang magmato-mato sa saiyang pamilya lalo na sa mga tugang na maluya an kayod.

Kan aki pa siya sabi kan mga taga-Calabanga si David iyo an kakawat ni Congressman Gabby Bordado mala ta siya an caddy sa karawat na golf sa barangay Del Carmen.

Ngonyan siya an Boradol King sa Metro Naga Sports Complex kada summer, on-air or off-air, on-campus or off-campus.

Nagpoon siyang magsikat sa LV kaiba si station manager Butch Robredo, production manager Ernie Verdadero, Rick Diaz, Cris Rances, Gil Basmayor, Oscar Monte Agodo, Armi Asor, Ato Peṅa asin Jimmy Letada.

Saro sa mga reporters kaidto an ngonyan mayamanon na si Noel de Luna.

Kan maguin politiko an saiyang mga pag-iriba, nagbalyo siya sa RNM-DZHN ki Celso Baguio sa Queborac Naga City. Duman naguin sikat siyang emcee sa entablado sa mga liveshow. Favorito siya kan mga tao ta grabe ang sense of humor nakakapangisi maski siya mismo dai nagngingirit.

An saiyang pirming katambal sa stage iyo si Bert delos Martirez orog na duman sa famusong Search for Mrs. Bicolandia.

Kan magbukas an DWNX-FM kinua siya bilang primetime announcer kaya siya an pinaka-primiro asin solong broadcaster sa Bikol na binayaran nin Royalty kan top management na ginatos na ribo.

Sosog sa estorya kan magpa-Manila si David ta makobra kan saiyang kuarta asin kaka-ulayon kan mga opisyales sa itaas pig-kakabit pa siya ni SM Al Ubaṅa pagbalyo sa pedestrian lane kan mahiwas na tinampo sa Manila.

An NX an pinaka-primirong FM station sa Bikol na AM an programming.

Sa NX siya an nag-introducir kan chika sa bareta na naguin bantugan na marhay poon kaidto sagkod ngonyan.

Siya man an broadcaster na haciendero pero para-ataman nin baka asin para-mais (bakong corny). Haling NX nagbalyo siya sa DZGE kun saen siya lalong suminikat kaibanan si Atty. Briguera asin iba pa.

Sa halipot nang panahon nagbalik siya sa BBS. Ngonyan yaon na siya sa Ok Fm-PBN Tv 5 asin facebook live worldwide aga-aga. Ka riding in-tandem niya si Ervin Borja. Sabi may mati-mati si David.

Ngonyan pa lang ini-imbitaran ko an gabos na mga paradangog na i-tape an mga programa ni David tangarig maitago an saiyang magagayon asin bulawan na Bikol.

Pero an pinaka-remedyo bako an dialysis kundi an pagbalik-balik ninda ni Melba sa Blessed Sacrament.

An orag ni David iyo ta imbis na iwalon o tiraduron o talayupon inamigo niya logod si Goliath, an saiyang bossing sa kinaban.