CITIZENS CRIME WATCH KATUWANG KAN LGU: Anomaliya sa SAP pinapa-imbestigaran

Mga miembros kan Sangguniang Bayan sa Libmanan, Camarines Sur sa pamamayo ni Bise Alcalde Gerardo ‘Dondon’ Atienza (sa tahaw) pigtutukar an agenda kan mga reclamo sa pagtao kan biyaya sa SAP sa mga apektadong konstituentes kan ECQ.

Libmanan, Camarines Sur. An Sangguniang Bayan sa banwaan na ini sa pamamayo ni Bise Alcalde Gerardo Atienza nagpasar nin resolucion na nag-aawtorisar ki Alcalde Bernand Brioso na magbilog nin sarong grievance committee nganing imbestigaran an anomaliya sa distribusyon kan DSWD Social Amelioration Program na apektado kan Enhanced Community Quarantine.

An komite compuesto kan mga representante hali sa Municipal Social Welfare and Development (MSWD), Department of Interior and Local Government (DILG), Tesurero Municipal, Civil Society Organization asin Libmanan Business Club.

Igwang pugol na verified complaint an SB hali sa mga barangay huli kan pag-ayon sa listahan asin pagrecibe komo mga resipientes kan SAP arog kan gadan na, paratukdo, agom kan opisyales de barangay, 4Ps, asin empleado kan gobierno, sabi ni Atienza sa entrevista kan Bicol Mail.

Sa ginibong sesyon regular kan SB kan nakaaging Lunes, Abril 20 pigtulod kan bise alcalde an pagpasar nin resolucion na nag-aawtorisar ki Alcalde Bernard Brioso na sangatan nin caso administrativo an mga nag-abuso sa poder na opisyales de barangay sa pagpili asin pagtukdo kan dapat na maging recipientes kan SAP.

Sinabi pa ni Atienza na naghahagad na sinda nin kopya sa mga Barangay kan mga listahan kan mga nakarecibe nin biyaya hali sa SAP asin mandato pa na dapat i-post an mga pangaran sa Barangay Hall.

Dakul pang mga dapat kalipikado sa SAP sa saindang banwaan alagad an kahapotan tano ta nawara an saindang pangaran asin pano si naging sistema sa paglista kan mga recipientes.

Base sa opisyal na listahan nag-abot sana sa doce mil an natawan kan SAP.

An mga Barangay iyo si namahala sa paglista kan dapat na mga benipisyaryo asin an mga representante kan DSWD Camarines Sur iyo an nag-validate mantang dai nakiaram an LGU Libmanan, sabi pa.

Si Jose ‘Nonoy’ Dy, chairman kan Citizens Crime Watch (CCW) sa banwaan nin Libmanan asin opisyal kan Business Club nagpahayag sa entrevista kan Bicol Mail na andam siyang nagtabang sa LGU sagcod na magkaigwa sinda nin joint investigation nganing masangatan nin caso administrativo asin kriminal an envueltong opisyales de barangay.

Sa 75 barngay digdi 50 nang mga kapitanes de barangay an pigparecibe na kan CCW nin kopya na naghahagad sa sainda nin documentos o kopya kan mga pangaran na nagrecibe nin biyaya hale sa SAP. An ibang opisyales de barangay nagsasayuma na magtao sa saiya kan kopya alagad kun padagos na masinutil sinda puedeng sangatan nin caso sa Ombudsman, sabi pa ni Dy.

Sa kaparejong sesyon regular an SB nagpasar pa nin resolucion na nagbibilog nin Local Finance Committee nganing iyo an mag-evaluar kun panong ginamit si P25 milyon na Bayanihan Grant kan gobierno nasyonal asin si lokal na fondo na nag-aabot sa total na P58-M na ginamit sa Covid 19 mobilization kabale na digdi si pigtaong ayuda sa mga residentes kan barangay. (DPAureus)