Opisyales de brgy na nagdaya sa SAP, sasangatan caso-LRay

Nganing masangatan nin caso administrativo, nakatalaan pa-imbestigaran kan sarong congresista sa Camarines Sur an anomaliya na naman sa distribusyon kan DSWD Social Amelioration Program (SAP) na envuelto an nagkaperang mga opisyales de barangay kan tercer distrito.


Si Congresista LRay Villafuerte kan segundo distrito kan Camarines Sur asin saro sa padreno kan ‘Bayanihan to Heal as One Act’ na kabale sa probisyon digdi an pagtao nin SAP sa mga apektado kan enhanced community quarantine (ECQ) nagpahayag na igwa na sindang pigtitipon na mga evidencia kabale an mga retrato, documentos sa mga nagrecibe kan ayuda na dai man kalipikado alagad pigtawan prioridad kan ibang opisyales de barangay nganing makaayon sa pinal na listahan kan DSWD.

An mga envuelto digdi iyo an nagkaperang kapitanes de barangay kan mga banwaan nin Magarao asin Ocampo, parejo kan tercer distrito kan CamSur alagad dai paman nginaranan kan congresista.

Saiyang isusumiter sa DILG asin DSWD an mga natipon na evidencia nganing imbestigaran.

Magigirumduman an DILG nagpaluwas nin patanid na saindang sasangatan nin caso an mga envueltong opisyales lokal o barangay na nagmakis-makis kan listahan kan mga benipisyaro sa SAP.

An junta provincial kan Camarines Sur nagpasar nin resolucion na nag-aawtorisar ki Gobernador Migz Villafuerte nganing maglaog sa memorandum of agreement sa DSWD na itiwala asin ipamahala sa jefe ejecutivo an pagdistribuer kan social amelioration sa mga konstituentes kan provincia nganing matabangan si apektado kan ECQ.

Ini afuera kan resolucion hali sa mga Sanggunian Bayan na sainda nang ipinapasa sa Capitolyo Provincial an pagdistribuer an SAP sa mga recipientes. (DPAureus)