Sesyon kan SP online na

Pili, Camarines Sur. Pigkukundusir na sa paagi nin online an manga special session kan junta provincial kan Camarines Sur mantang nagpapadagos pa an Enhance Community Quarantine (ECQ) na nakatutuk an saindang agenda sa mga programa epekto kan coronavirus disease (Covid-19).

Puon kan Marso hasta ngonian na Abril nakatulo na sindang online special session na pinamamayohan ni Bise Gobernador Imelda Papin komo presiding officer.

Sinabi ni Vokal Angel Naval, pamayo kan Committee on Internal Rules Government and Human Resource Development kan SP, nagsabi na si enot nindang pinasar sa special session kan Marso 27 naghahagad sa gabos na mga government and private financing institutions na tawan nin tolong bulan na moratorium an mga presenting mga inutang asin igilid muna an pag-imponer nin penalidad asin iba pang interes mantang an nasyon padagos pang nasa state of calamity huli sa krisis sa Covid-19.

Naenot an SP resolution kan CamSur asin dai nahaloy nagpaluwas man an Inter-agency Task Force (IATF) nin haros kaparejong direktiva na mag-implementar nin moratorium an financing institutions na iyo na an iimplementar.

Kan Abril 15 nagpasar nin resolution an junta na nag-aawtorisar ki Gobernador Migz Villafuerte na maglaog sa kasundoan sa DSWD sa pagdistrubuer kan social amelioration sa mga kunstituentes nganing maparikas na makaabot sa mga barangay.

Kabale pa sa saindang pinasar iyo an pagtao nin Covid-19 hazard pay sa mga calificadong frontliners o empleados kan Capitolyo Provincial, anti-discrimination order sa mga health workers, frontliners, huli sa Covid-19 asin iba pang mga volunteers, service workers maging an familia kan pasyante na tinamaan kan virus, pagsulot nin face mask asin kan Abril 17 ordinansa sa supplemental budget para sa Bayanihan Grant kan CamSur na nagcacantidad nin P114.3-M asin nagkapera resolucion sa mga programa laban sa Covid–19.