Phase-out sa manga PUJ babrasohon na kan DOTr

May 8, 2020

Sarong pambabraso an taktika kan Department of Transportation (DOTr) na planong tugotan na magkayod ngonian na panahon kan General Community Quarantine (GCQ) an Euro 4 na pampasajerong jeep nganing dagos nang ipasunod an controvercial modernization phase out kan mga PUJ


Pigbuyagyag ini kan sektor nin transporte sa paagi ni Joel Pillogo, lider kan Condor-Piston Bicol na papadatulan na dahilan kan DOTr na an Euro 4 maiimplementar  an physical distancing envez na PUJ na taraidan an pasajeros.

 Sektor nin transportasyon padagos nagpoprotesta contra sa jeepney phase out. (change.org.)

 


Malinaw na pambabraso an plano kan ahencia na maresulta sa pantitilok sa hanap buhay kan mga pobreng tsuper asin operator kan mga PUJ.


An isyung ini saindang cocontrahon particularmente kan saindang lideres sa transporte sa Metro Manila nganing dai mawaran nin hanap buhay an ribo-ribong tsuper asin operator kan PUJ.


Pigpupunan nang i-converter an ibang mga PUJ sa E-Jeep alagad sa kondisyon na dapat isuko si lomang franquicia na pig-isyu kan Land Transportation and Regulatory Board (LTFRB).


 Paralisado pa an viaje kan PUJs mientras na hinahalat pa an guidelines na ipapaluwas kan DOTr.


An physical distancing iyo an mawot estrictong iimplementar kan LTFRB huli kan padagos pang naglalangkaw an casong coronavirus disease (Covid -19).


Sa kaparejong entrevista sa lider kan Condor-Piston Bicol, dakul pa sa saindang pag-iriba sa saindang sektor an dai pa makakarecibe nin social amelioration hali sa Department of Social Welfare and Development.


Saindang pigdedenuncia an nagkaperang opisyales de barangay asin politico huli kan may mga pinapalaen sa pagtao kan biyaya hale sa SAP program kan DSWD.


Tama sana an patanid kan DILG na dapat sangatan nin caso si mga opisyales de barangay na envuelto sa pandadaya sa payout kan SAP, sabi pa.


Nagtitirios na ngani sinda alagad gagamitan pa nin pambabraso nganing pirit na iimplementar an jeepney phaseout, sabi pa ni Pillogo.

Share on Facebook
Share on Twitter
Please reload