Caso sa ASF sa CSur dai pa nagkukulpa

Dai pa nagkukulpa an casong African Swine Fever (ASF) sa Camarines Sur mala ngani maabot na sa 876 na mga may-origan an isinuko na an saindang ataman na hayop sa NationaL Meat Inspection Service (NMIS) asin sa Department of Agriculture nganing i-depopulate asin dai na mag-ulakit an virus.

Si Emily Bordado, regional information officer kan DA Bicol nagsabi na sainda nang nabayadan nin cash na P23,230.000 sa total na 4,648 na payo nin orig an ginaradan hale sa 55 barangay sa municipalidades kan Calabanga, Bombon, Magarao, Minalabac asin sa Ciudad nin Naga alagad ini base sa listahan ninda kan Abril 24.

An mga banwaan/ciudad na ini kabale sa apektado kan ASF asin cada payo na ginagadan binabayadan nin P5,000 kan DA sa maximum na veinteng payo cada maysadiri.

Nagpapadagos pa an depopulation sa apat pang dugang na apektado kan ASF sa mga barangay kan municipalidades kan Canaman, Camaligan, Gainza asin Cabusao alagad an partial depopulation an ginibo sa mga banwaan kan Canaman na igwang 786 na payo na sadiri kan 141 backyard raisers, Camaligan igwa nang 566 na payo na sadiri kan 89 paraataman kan hayop, Gainza igwa nang 54 na sadiri kan 12 paraataman nin orig asin sa Cabusao igwa nang 201 nin payo asin 32 na mga paraataman, sabi pa ni Bordado.

Igwa naman nin pig-depopulate na 445 sa barangay Burabod, Pamplona na apektado digdi si 95 paraoma. Afuera sa ASF, an DA nagseserbe man na frontline nganing maseguro an suplay nin pagkakan kan mga Bicolando sa tahaw kan krisis sa Covid-19.