Lockdown Fiesta

Ngonyan lang ini na nasa lindong kita kan General Community Quarantine (ECQ).

Nagpoon an aldaw na matoninong na marhay, repeke lang kan kampana kan simbahan an nadangog, may misa pero mayong parasimba. Mayo ngani nin prosisyon sa bisperas kan naka-aguing hapon.

An aldaw na ini, Mayo 1, pista bako lang digdi sa Milaor na an patron si Senyor San Jose Obrero, pista man sa banwaan nin Lagonoy (an pinakadakulang banwaan kun an land area an pag-uulayan sa Camarines Sur) na an patron si Santiago saka San Felipe, asin celebrasyon kan Labor Day o kaaldawan kan mga trahabador o obrero.

Palibhasa dai nagburuno nin orig mayo nin dinuguan kan besperas, mayo man nin puwesto sa kaaldawan. An pamilya yaon sana sa laog kan harong, ordinaryong pamahawan, simpleng pangudtuhan asin dikit na pamang-guihan na pwede lang na ibutong nin tamong.

Mainiton an maghapon, maharasahas pa marhay ngani ta mayong brownout ta nag-aarandar an mga ventilador.

Kun mayo pwede man abaniko.

Palibhasa mayong maguinibo, mayo man nin tao, mayo man bisita nagluwas ako sa harong maski senior na makasagap lang ning vitamin D asin maestera lang an tohod na kun magparatukaw malulupog.

Paka pamahaw nagpasiring ako sa kapelya kan barangay San Jose tanganing magpangadjie asin magkua nin litrato sa chapel na mayo man nin tao pero bagong pintorado.

Nag-agui ako sa barangay hall, multi-purpose building na may pangaran LVillafuerte sa kalabaan kan San Lorenzo Street, nag-agui ako sa antigong tulay (tinugdok kan 1950) nagsiko ako pawala pasiring barangay San Roque alagad may barikada, nagbalik ako asin nagderitso pasiring chapel. May mga dara akong diyaryong Bicol Mail, piglibrar ko sa mga pig-aaguihan kong harong, enot duman sa nagtao sako nin preskong gulayon na patola asin okra, ki ex-kapitana, sa pinsan kong may tindahan, pigpaipitan ko nin kopya an gate na may nakabugtak nin “outsiders do not enter”, sa magayon na harong ni MMO aka Donya Marilyn Monte Ortiz, sa harong ni Kagawad Susa, sa harong ni banker Nongnong Santiago, sa harong ni Kagawad Jun Marquez, sa mansion ni balik-bayan Jun Quijano asin iba pa sagkod na makaabot ako sa checkpoint na pigbabantayan nin mga frontliners na barangay tanod, barangay kagawad asin iba pang mga volunteer frontliners.

Atang mainit, mapungaw pa ta didikit an tao.

Pagpuli ko sa harong pagudto na. May nagregalo sako nin sinuman, may hinog na bayawas asin pili, an pili nilanta, an bayawas kinakan kong hinog ta mayaman sa vitamin C apwera kan dikit na maluto an sira ko nilabunan na sugok.

Kan bespiras may bisita ako na nagpangudto kami sa bahay-kubo na an sira sinigang na karne, may pakwan asin an merendalan mi balisoso. May social distancing ta yaon duman sa dakulang bilog na lamesa ako sa ibong, maghapon kaming nag-orosiponan tungkol sa estorya kan banwaan, buhay mayaman, buhay kan kinapobrehan asin an maabot na buhay pakatapos kan Covid 19. Si MMO pinsan kaidtong sakuyang agom. Haloy siyang nag-estar sa Manila kaya magayon an samuyang estoryahan.

Kan anti-bespiras April 29 ( Golden Wedding Anniversary ni Cong. JoSal Furtuno na mayo man nin punsyon ta lockdown). May sorpresa akong bisita si ex-kapitan Antonio Cataneo, dating radio technician sa Naga, ta igwa daa siyang na diskobreng bulong kontra sa Covid 19. Pan-albularyo daang bulong hali sa daga asin mga masitas. Tibaad daa matabangan ko siyang maibalangibog an saiyang imbensyon. An sabi ko man isurat niya muna sa papel ta babasahon ko bago ko irecomendar na siya interbyohon kan mga taga-radyo asin telebisyon.

Kun kuta na buhay an sakuyang radio-tv program na facebook live worldwide, imbitaran ko siyang maguin bisita tangarig maibuyagyag niya sa publiko an saiyang magayon na kaisipan.

Ngonyan na aldaw kapistahan na gayo sa banwaan mayo logod akong bisita. Palibhasa medyo basog pagkapangudto naghirihigda ako sagkod na mapaturog.

Nakubanan ako asin nakamata sa biglang ring kan cellphone. Kan simbagon ko sa ibong na linya an nadangog ko an boses ni Manong Jojo Villafuerte. Hain ka Mano hapot niya. Sabi ko man nasa Milaor. Madiyan ako saimo ta may itatao. Sabi ko man, sige.

Dai ngani nag-10 minutos yaon na sa tungod kan harong ko an SUV ni ex-kapitan Jojo Villafuerte kan barangay Peṅafrancia Naga City, manager asin may sadiri kan Crazy Cut Woodcraft Incorporated, pinakadakulang paraguibo nin muebles, tropeyo asin medalya sa enterong Bikolandia.

Paglaog sa sadit kong harong may bitbit na medalya na may nakabugtak na Medalya ng Kabayanihan Frontliner Covid 19, 2020 sa likod may logo an Sarong Banggi Organization International. Si Manong Jojo naguin national chairman kan SBOI sa laog nin siyam na taon.

Ngalas ako ta nakakamisita lang ako, naka shorts pa sinabitan tulos ako nin medalya asin nagpalitrato kami sa saiyang driver na saro man na SB hermano.

Kan mai-post sa facebook an litrato ming duwa labing sangribo an naglike, nagpaabot nin congratulations asin iba pang mensahe. An reaksyon bako lang local kundi national asin international.

Dai ko daw hunaon na an sarong ordinaryong aldaw maski pista asin pista opisyal magiguin arog kaidto kabongga.

Ngonyan tubod na ako na maguin sa nasyon o kinaban, sa Pagkasararo may Kusog asin maogma.