Mga banwaan sa 3rd dist kan CSur dapat isuhay na sa Naga

Panahon nang magkasararo an mga lokal na gobierno sa tercer distrito kan Camarines Sur nganing bako lang mag-asa sa ngaran na negosyo sa Ciudad nin Naga para mag-asenso sa man ngaran na economia an pagtaraid na banwaan asin dapat pag-urulayan na an ‘‘reapportionment’’ kan congressional district.


Saro sa nakasabrit digdi iyo an labi-labi nang ka-estricto kan Ciudad nin Naga sa pag-implementar kan check point asin iba pang sadiring pulicia na luwas naman sa reglamento kan Inter Agency Task Force apesar na mayo ngani ni sarong caso sa coronavirus disease (Covid-19) sa pagtaraid kan ciudad an resulta kaini, apektado an banwaan na negativo sa virus.

Si Consejal Levy Sta Ana, miembro kan Sangguniang Bayan kan Calabanga, Camarines Sur nagpahayag na panahon nang buhayon an saindang pigtutulod na ‘‘reapportion’’ na pendiente na an propuestong bill sa Camara-Baja.

Alagad saiyang piglinaw an saindang resolucion bako sa dahilan habo na sa nagtutukaw na Congresista Gabriel H. Bordado Jr. kan 3rd Congressional district envez sa ngaran na pag-asenso sa economia.

Sa resolucion kan SP an macompuesto kan bagong distrito iyo an Camaligan, Canaman, Magarao, Bombon asin Calabanga asin an suhay na distrito kinababalehan kan Ciudad nin Naga, Pili asin Ocampo.

Nangyari ngonian na panahon kan Enhanced Community Quarantine (ECQ) apektado an mga residentes kan mga banwaan kan Canaman, Magarao, Bombon, Calabanga maging an Tinambac apesar na mayo man sa sainda nin caso sa coronavirus disease (Covid- 19) pinapadificilan sinda sa border line kan ciudad arog kan mga reclamo na kaipuhan makabakal nin bulong dai pinapalaog kun ano-anong mga hinahagad maging an pag-saod sa Naga City People’s Mall.

An Calabanga kumpleto naman sa ngaran na negosyo afuera sana kan darakulang botica asin bangko. Segun ki Sta. Ana kun mag-asenso man sa ngaran na economia an mga banwaan na suhay sa ciudad dai na sinda maasa sa Ciudad nin Naga.

An ibang LGUs na miembros kan Metro Naga Development Council (MNDC) kan yaon pa sa irarum kan ECQ nakamate nin kadificilan asin apektado an economia an saindang mga banwaan.

Sa entrevista kan Bicol Mail ki Calabanga Mayor Eduardo Severo, nag-urulay man kuta an MNDC sa pag-isyu nin travel pass kan Incident Management Team kan City Hall sa saindang saradit na negosyante alagad limitado sana sa tolong passes. Naghagad man kuta sinda nin reconsiderasyon na dugang pa na passes alagad dai na nagtugot an City Hall.

Alagad sa pinakahuring miting ninda sa MNDC kan Domingo, tinawan an Calabanga para sa dugang na tolong travel pass para sa saindang retailers.

Huli kaini, an ibang namamanuan kan Canaman, Calabanga, Magarao, Bombon asin Tinambac dapat mag-urulay an MNDC nganing hagadon na tugakan man an border line na pig-iimponer kan City Hall.

Plano kan residentes sa sinambit na mga banwaan na sa mercado publiko na sinda kan Calabanga magsaod envez na sa Ciudad nin Naga.

Sa lado kan City Hall nag-iimplementar sana sinda kan mga reglamento sa ECQ asin maibitiran an pagparalangkaw sa Covid case an ciudad asin sa proteksyon kan saindang residentes.

Kun igwa man nin mga negativo kumentaryo sa City Hall, saindang iginagalang iyan, sabi sa mga pahayag ni Alcalde Nelson Legacion.

Hagad ni Rivero sa pagtaraid nindang alcalde na magkaigwa sinda nin miting nganing hanapan nin solusyon an problema sa pagsaod sa Naga City People’s Mall kan ciudad.

An banwaan nin Calabanga saro sa padagos nag-aasenso an negosyo mientras na nagkapera nang establismiento an nagbukas kan saindang negosyo mantang an iba nagpapatindog na kan saindang edificio.