Enrollees sa mga pribadong escuelahan mababa, sabi

Piglalaoman na mababa an mapalistang estudiantes sa mga pribadong escuelahan huli kan krisis sa economia epekto kan Enhanced Community Quarantine (ECQ) asin huli kan paglangkaw kan casong coronavirus disease (Covid- 19).

Alagad si Undersecretary Diosdado San Antonio kan Departmento de Edukasyon (DepEd) nagsabi na saindang piglalaoman na mas malangkaw an populasyon nin estudiantes sa mga pampublikong escuelahan.

Si San Antonio, na sarong Bicolano asin taga digdi sa Camarines Sur iyo an Undersecretary for Curriculum and Instruction kan DepEd nagpahayag na bukas an mga public school sa mga estudiantes na kulang na an kakayahan kan saindang familia na magpadagos sa pribadong escuelahan huli kan dakul an na-apektohan kan ECQ asin nawaran nin trabajo.

Nagkaperang mga pribadong colegio asin Universidad sa Bicol an mapalangkaw nin matricula, alagad an Departamento de Edukasyon (DepEd) nagpahayag na puede pang gibohon para sa maabot na school year. alagad an DepEd nagsabi na mayong problema ini kaipuhan sanang magsumiter an mga pribadong escuelahan nin mga documentos na pigmamando kan Commission on Higher Education sa opisina rehiyonal.

Sinabi pa ni San Antonio ‘‘For private schools, as has been the practice, we (respect) their right to determine their respective tuition rates,’’

Aram kan mga pribadong escuelahan na kun na-implementar nin dugang na matricula naresulta man ini sa pagbawas kan saindang enrollees.

Sa guidelines kan ahencia an mga pribadong escuelahan na mapalangkaw nin matriculta dapat magsumiter nin documento na nagkaigwa sindang konsultasyon sa saindang mga stakeholders.

An DepEd enot nang nagsabi na an burokasan kan masunod na school year sa huring semana kan Agosto alagad saindang tinutogotan an mga pribadong escuelahan na puede man sinda na magdesisyon na an opening of school puedeng sa pag-ultanan kan Hunyo hasta Agosto.