Partido area naalarma kan pinakainot na Covid-19 case


ABO CHECKPOINT. Tulos nagpaluwas nin direktiva an lokal na gobierno kan Tigaon, CSur na iimponer an lockdown sa brgy. Abo, kasunod kan kumpirmasyon kan DOH sa pinaka-inot na casong Covid 19 sa Partido area. (LGU Tigaon)



Naalarma an mga banwaan sa Partido area kasunod kan kumfirmasyon kan Departamento de Salud (DOH) sa Bicol kan pinaka-inot na casong coronavirus disease (Covid-19) sa Camarines Sur na 23 anyos na daraga taga barangay Abo, Tigaon.

An barangay Calalahan, San Jose, CSur asin Salogon, Sagnay, CSur kataid na barangay kan Abo tulos nagbugtak kan saindang checkpoint nganing maimplementar an lockdown asin dai tinutugotan an arin man na residentes kan barangay digdi na magluwas kun bako man nin emerhencia.

Alagad namundo si Alcalde Chique Fuentebella kan ma-irehistro sa DOH an ika-duwang caso sa Covid- 19 sa banwaan nin Tigaon na tulos naging estricto sa mga checkpoint.

Sinabi kan DOH nag-eedad 41 años na lalaki na ika-60 pasyente sa total na 62 na caso sa Bicol.

Si Consejal Audie Concina kan LGU San Jose na kabale sa enot na grupo na nagbantay sa checkpoint sa Brgy. Calalahan nagsabi na tulos naging alertado an mga opisyales lokal asin barangay kan San Jose asin Sangay nganing dai makalaog an hale sa brgy. Abo sa katuyohan kaini para sa proteksyon kan saindang residentes.

Segun sa DOH an pasyente na yaon na ngonian sa pribadong isolation facility igwang s igwa nin history nin pag viaje sa Manila. Nag abot an pasyente sa Tigaon kan Abril 4, 2020 asin nagpasa irarum sa 14 diyas na cuarantina. Ginibo an Rapid Anti-Body Test kan nakaaging Mayo 5, 2020 asin nagpa consulta sa BMC sa kaparejong aldaw asin nagpasa irarum sa RT-PCR testing.

Siya sarong asymptomatic asin nagpapabulong na sa. An mga awtoridad sa salud tulos man nagconducir nin contact tracing asin sa ngonian an barangay Abo pigpasa irarum na ni Alcalde Fuentebella sa lockdown para sa proteksyon kan namamanuan.

An LGU nagpaluwas nin Administrative Order No. 20-024 na puon Mayo 9, hasta Mayo 15, 2020 saindang pig-iimplementar an mga minasunod: 1) Bawal na magluwas nin harong afuera kun igwang emerhencia; 2) Suspendido an paggamit kan quarantine pass, kun may babakalon puedeng isugo sa mga tawo sa checkpoint; 3) Estrictong pig-iimplementar an 24 oras na curfew hour asin bawal mag-inum nin arak; 4) Dai tinutugotan na magluwas asin maglaog an mga bakong awtorisadong tawo asin lunadan; 5) Tinutugotan magluwas nin harong an mga frontliners asin iba pang essential workers base sa IATF rules; 6) Matao nin pagkakan sa barangay sa koordinasyon kan LGU-Tigaon; asin Malibot an market on wheels. (DPAureus)