Sektor nin transporte gurutom na sa pangakong ayuda kan gobierno

Harapay na kahahalat an rinibong mga tsuper nin pampasajerong jeepney sa Kabikolan sa pangakong subsidiya sa mga tsuper na P5,000 hasta P8,000 kan gobierno sa tahaw kan padagos pang dai sinda makakayod na sagcod sa ngonian nagpapadagos pa an cuarintina asin dai makakayod.

Sa datus na nakua kan Condor-Piston sa Land Transportation Franchising and Regulatory Board (LTFRB) sa central office maabot sa tres por ciento pa sana an natatawan nin ayuda alagad sa Metro Manila pa sana dai pa kabale sa ibang mga rehiyon.

Sinabi ni Joel Pillogo, opisyal na parataram kan Condor-Piston sa Camarines Sur maging si Acting Regional Director Edgardo Montialto kan LTFRB nagkunfirmar kan abalang distribusyon kan ayuda sa mga tsuper na sagcod sa ngonian mayo pa nin hanap buhay para sa saindang familia.

An proceso segun ki Montialto an mga pangaran kan tsuper na dapat calificadong benipisyaryo kaipuhan isumiter kan saindang presidente kan saindang asosasyon sa LTFRB alagad maagi pa sa validations kan Department of Social Welfare and Development (DSWD).

An mamundo si dai miembro kan arin man na asosasyon kan sektor nin transporte dai tinatawan nin considerasyon si indibiduwal na ibali sa dapat recipientes, sabi pa ni Pillogo.

Huli kaini, si orihinal na listahan sa enterong nasyon si dating 436 mil nahulog na sana sa 280 mil an makakarecibe nin ayuda hale sa gobierno.

Kun binaba na an fondo sa Bicol an opisina kan LTFRB iyo an mamahala sa pay out.

Apesar na mayo pa an tabang finansyal kan gobierno sa sektor nin transporte, sinabi pa kan Condor-Piston pinapadificilan pa sinda na ma-isyuhan nin special permit kan LTFRB huli kan mga pambabraso kan Department of Transportation (DOTr) nganing ma-implementar na an jeepney modernization. (DPA)