Brgy, LGU checkpoint dai na awtorisado kan Bicol IATF

Pinapagaba na kan Bicol Inter-Agency Task Force for the Management of Emerging Infectious Disease (Bicol IATF) an gabos na mga checkpoint sa barangay na binabantayan kan Brgy Tanod asin Staff kan LGU asin puon kasoodma dai na sinda awtorisado kan ahencia.

Si regional director Anthony Nuyda kan Department of Interior and Local Government (DILG) sa Bicol asin pamayo kan Bicol IATF nagsabi an saindang direktiva base sa inaprobaran na resolucion numerado 07.

An checkpoint sa mga borderline asin sa barangay dapat an namamahala iyo an Philippine National Police o Phil. Army na iyo an awtorisado kan Bicol IATF.

An aksyon kan task force sa tahaw kan mga reclamo sa abusong pagpadalagan kan checkpoint kan barangay officials, Staff kan LGU asin Brgy Tanod na kulang sa training envez dapat ipamahala man giraray sa PNP.

Nagpaluwas naman nin direktiva an Bicol IATF sa mga local government unit (LGUs), barangay asin PNP na estrictong ipasunod an Resolution No. 07.

An resolucion pirmado ninda DILG director Anthony Nuyda, DOH director Ernie Vera, DSWD director Arnel Garcia, DoT Director Benjamin Santiago, asin OCD director Claudio Yucot.

Nagwarak an mga barangay checkpoint asin LGUs kan panahon kan enhanced community quarantine sagcod sa general community quarantine na pig-establiser kan Incident Management Team (IMT) kan LGUs alagad igwa man nin suhay na checkpoint an PNP.

Nagkakanya-kanyang guidelines sagcod na nariribong na an publiko asin naging dahilan kan Bicol IATF na ipahale na an mga barangay checkpoint.

Sa Ciudad nin Naga, sinabi ni City Director P/Col. Felix Servita Jr. kan Naga City Police Office na tulos nang hinarale kan barangay an saindang checkpoint envez kun igwa man yaon iyan sa pamamahala kan PNP.

An NCPO igwang sampulong checkpoint na naka-establiser kadakle sa mga borderline.

Hinahagad kan PNP na kun igwa pang barangay na nagsisinutil sa resolucion kan Bicol IATF dapat isumbong sa saindang jepatura nganing gabaon. (dpa)