City Hall inapod na ‘masiri’ kan kataid na LGU

Naghihinanakit an lokal na gobierno kan Canaman, Camarines Sur sa Ciudad nin Naga sagcod na inaapod na ‘masiri’ an City Hall huli kan sobra naman ka estricto sa borderline na mayormenteng apektado an transaksyon kan residentes sa ciudad sagcod na apektado an pagbuhay.

An aksyon kan LGU, sinabi ni Alcalde Nelson Legaspi nag-imbitar sinda nin investor sa Siruma, Camarines Sur nganing regular na magsuplay nin sira sa saradit na negosyante sa mercado asin an iba yaon na sa sidewalk kan barangay San Agustin.

Katuyohan kan jefe ejecutivo nganing dai na madificilan sa pagsaod an saiyang namamanuan sa Naga City People’s Mall, barato pa an presyo asin labas an pinapabakal na mga sira sa consumedores sa saindang banwaan.

Afuera pa kaini, igwa nang mga panienda nin gulayon asin ini pabor sa consumedores kan banwaan nin Canaman dai pa magagastosan sa flete sa pag-viaje sa Naga asin dai na ma-aabala sa pagkua nin border pass.

Sa lado kan Incident Management Center kan City Hall sinda nag-iimplementar sana sa mga pinapasunod na guidelines kan Inter-Agency Task Force kun igwang mga checkpoint huli kan ECQ/GCQ sa tahaw kan krisis sa salud huli kan coronavirus disease (Covid-19).

MANGA RESIDENTES KAN CANAMAN

KADAKLE PASIRING NA SA CALABANGA

Sinabi pa ni Legaspi na cincuenta (50) por ciento kan mga nagkukuang border pass sa saindang banwaan an viaje Calabanga lalo na kun pagkakan an saindang tuyo.

‘‘An katutuanan an gabos na residentes sa samong banwaan kun puede i-encourage ko sa Calabanga nalang magsaod mantang kumpleto naman digdi yaon an mga labas na sira, badi, gulayon, igwa nang bangko asin igwa nang mga darakulang establisimiento puede nang mabakal digdi an mga pangangaipo kan mga habitantes kan Canaman’’

Alagad igwang mga essential goods na nakabase sa Ciudad nin Naga komo iyo an centro de comercio. Huli kaini, napipiritan na maglaog giraray sa ciudad, sabi pa kan jefe ejecutivo.

Si barangay kgd Jess Regalado kan San Agustin, nagpahayag saro man siya sa negosyante asin dakulang bagay an decisyon kan saindang alcalde na alokon an mga investor hale sa Siruma nganing iyo an magsuplay kan labas na sirang dagat.

Igwa na sindang fish section asin an nagbabagsak kan labas na sira sa sinda hale sa banwaan nin Siruma asin digdi na nagsasaod an mga residentes kan Canaman.