1.8M target mapa-enroll sa escuelas publica sa Bicol

Nagsikad na an enrollment sa mga escuelas publica kan Lunes, Hunyo 1 asin target giraray kan Departamento de Edukasyon (DepEd) an maabot sa 1.8 milyon na estudiantes sa kindergarten, elementarya asin segundarya mapapalista hasta sa Hunyo 30 para sa school year 2019-2020.

Alagad kabale na digdi si dating estudiantes na pasado sa gabos na subject kan nagtalikod na school year 2019-20 na considerado nang automatic enroll.

Nagbugtak nin mga Public Assistance Command Center sa mga escuelahan nganing masimbagan tolos an mga kahapotan kan magurang sa pagpa-enroll kan saindang mga aki.

Si dating kindergarten hasta sa grade 5 sinda gabos automatic enroll sa higher grade kun pasado sa gabos na subject asin sa segundarya sa grade 7 asin 10.

Si DepEd regional director Guilbert Sadsad nagsabi na piglalaoman ninda na si dati giraray na 1.8 million na record kan nakaaging school year mantang dai nang problema sa pagkukulang-kulang nin classrooms nin huli ta prohibido na an face-to-face learning.

Marikas na an ginigibong pagpalista puedeng online asin sa text messages sa mga cellphone number asin sa paagi kan face book (FB) na pig-post sa mga escuelahan asin barangay na dai na kaipuhan magpasiring sa mga escuelahan an magurang asin estudiantes.

Dinagdag pa ni Sadsad, dai na muna kaipuhan isumiter an mga documentary requirement sa panahon kan pagpalista envez puedeng gibohon sa panahon kan erescuelahan o sa bulan nin Deciembre 2020.

Si mabalyo sa pribadong escuelahan kaipuhan sanang mag-aviso na sinda ma-transfer na sa private school nganing halion na sinda sa listahan sa dating escuelahan, sabi pa kan DepEd.

Nagtutubod an DepEd Bicol na dai na mabagong desisyon an gobierno sa pigtalaan na burokasan nin klase sa Agosto 24, 2020 mientras na iginilid na ninda an face-to-face learning envez kaini, iimplementar an online classes, blended learning asin iba pang opsyon nganing magpadagos an estudiantes kan saindang pagklase na dai masasayang an panahon. (dpa)