ISYU LABAN SA SPL PERMIT: Manga operator, tsuper kan jeepney mapasurog na sa LGUs

Mapasurog na an sektor nin transporte sa mga lokal na gobierno tanganing hagadon sa Land Transportation Franchising and Regulatory Board (LTFRB) na ibasura na an rekisitos na magkua muna sa ahencia kan special permit para tugotan makabuelta sa pagkayog sa panahon kan modified general community quarantine (MGCQ).

Si Pio Samonte, consultant kan LCC Terminal sa barangay Sabang, Ciudad nin Naga nagpahayag na disganado an mga operator asin tsuper nin jeepney na may rutang premir asin man segundo distrito kan Camarines Sur matapos dai tungahon kan LTFRB an saindang miting na ginibo kan Viernes, Mayo 19.

Hahagadan ninda nin tabang an mga alcalde sa mga banwaan kan premir asin segundo distrito nganing tawan sinda nin reconsiderasyon asin dai na estrictohan sa special permit mientras na apektado an viaje sa mga banwaan kan San Fernando, Pamplona, Pasacao, Libmanan, Cabusao, Sipocot, Lupi, Ragay asin Del Gallego.

Ini an saindang solusyon sagcod na magdulok ki Gobernador Migz Villafuerte kan Camarines Sur.

Katuyohan ninda sa pag-imbitar ki LTFRB regional director Edgardo Montialto o an saiyang ipapadarang representante nganing hagadon na tugotan man sinda na dai na estrictohan sa pagkua nin special permit nganing makabuelta na sa saindang hanay buhay alagad an director dai nagtunga sa pigtalaan na urolay.

Presente sana an representante kan LTO asin iba pang mga operator/tsuper nin jeepney na viaje sa centro kan Ciudad nin Naga na kaparejo man an saindang katuyohan.

Sinabi pa ni Samonte, sa sinambit na miting an LTO nagpatanid na kun mapadagos sa pagkayod an jeepney na mayong special permit hali sa LTFRB saindang dadakupon an tsuper sagcod na mapamulta an operator nin abot sa P50,000.

An pagkayod na mayong special permit kunsiderado na kulorum, sabi pa kan LTO.

Sinabi man ni Joel Pillogo kan Condor-Piston sa Camarines Sur, kun tinugotan kan LTFRB an kaparejong sektor sa provincia nin Albay na puede nang mag-viaje an 30 por ciento kan mga jeepney dawa mayo nin special permit bilang kunsiderasyon huli kan pandemia, ano ta dai man tawan nin kunsiderasyon an kaparejong grupo digdi sa Camarines Sur.

Kan nakaaging semana si Gobernador Al Francis Bichara kan Albay, representante kan LTO, LTFRB asin an sektor kan jeepney na pig-urolayan na tugotan na an pampasajerong jeepney na magpadagos sa pagkayod dawa mayo nin special permit huli kan krisis ngonian na panahon epekto kan ‘‘deadly virus’.

Dai nakasayuma an LTFRB pigsuportaran an kahurotan kan sektor nin transporte.

Saro sa magabat na kahurotan kan ahencia na dai sinda iisyuhan nin special permit kun dai rehistrado sa Cooperative Development Authority bilang stock cooperative o mag-rehistro bilang sarong korporasyon. (dpa)