Pagbakal computer/laptop dai pinipirit sa manga magurang


DepEd sa Ciudad nin Naga nagbugtak nin Public Assistance Command Center nganing simbagon an mga kahapotan kan magurang sa pagpa-enroll kan saindang mga aki para sa school year 2020-21. (DPAureus)


An Department of Education (DepEd) Bicol naglinaw na dai ninda oobligaron an mga magurang na magbakal nin computer/laptop asin magpatakod nin internet connection nganing makaparticipar sa blended learning an saindang pigpa-enroll na estudiante sa mga escuela publika mantang dai na tinutugot an face-to-face learning sa masunod na school year 2020-2021 huli sa coronavirus disease pandemic.

Si mga magurang na mayong kakayahan na makabakal nin mamahalon na gadget saro sa programa kan DepEd iyo an self learning module kaya saindang pigpapaliwanag na dai pinipirit na magbakal nin gadget nganing maka-escuela an mga aki sa burokasan nin klase sa Agosto 24, 2020.


Ini an mga pahayag ni Regional Director Guilbert Sadsad kan DepEd Bicol kaya ngani padagos nindang pig-aalok an mga magurang na ipalista na an saindang aki na ma-escuela sa mga public school nin huli ta mismo si Presidente Rodrigo Duterte an dai nag-uuyon sa face-to-face learning.


Si mga may kakayahan na magurang an saindang aki maklase sa paagi kan virtual learning na gamit an saindang gadget na igwang internet connection.


Kabale pa sa saindang iimplementar iyo an radio broadcasting na katuwang kan ahencia an mga estaciones nin radyo maging an television.


Igwang paratukdo na mataong leksyon sa TV asin radyo mantang mayo dai na gigibohon an klase sa mga classroom.


Sa lado kan DepEd magkakaigwa man sinda nin mga internet connections sa pagdara kan saindang leksyon sa harong kan mga estudiantes.


Padagos na pig-aalok kan ahencia an mga magurang na ipalista na an saindang mga aki sa paagi kan online enrollment, puedeng mag-gamit nin cellphone sa paagi kan texting asin dai na kaipuhan magpasiring sa mga escuelahan.


An enrollment nagpuon kan Hunyo 1 hasta sa Hunyo 30, 2020. (dpa)