2 diputado sa Bicol nagvoto ‘no’ contra sa anti-terror bill

Duwang congresista sa Bicol kabale sa 36 na mga lehislador na nag-votong ‘’no’’ sa controvercial na House bill 6875 (Anti-Terrorism Act of 2020) mantang an saro sa mga co-author na Bicolano pinapabawi na an saiyang votong ‘’yes’’

Sinda assistant minority leader Gabriel H. Bordado Jr. kan tercer distrito kan Camarines Sur asin an betaradong lehislador asin Congresista Edcel Lagman kan premir distrito kan Albay kinukundenar an biglaan na pagkakalusot kan bill huli ta haros hinubaan nin libertad civil, freedom of expression, unconstitutional asin pagtinaktinak sa mga deretso humano.

Perang aldaw matapos kan vorotohan kan mga miembros sa congreso sa Anti-Terror Bill alagad sa ika-tolo asin huring pagbasa an saro sa mga co-author Congresista Joey Salceda kan segundo distrito sa Albay pinapabawi an saiyang pagsuporta sa bill asin irehistro envez ‘’abstention’’.

An representante kan Albay nagpahayag na an iba sa mga probisyon kan bill makaka-apektar ‘’right to privacy of individual’’ asin nagkapera pang seksyon an kaipuhan magkaigwa nin malinaw na interpretasyon. Sinabi pa ni Bordado na nagsusuporta siya ki Presidente Rodrigo Duterte kan kinakaipuhan nang ma-enmiendahan an Human Security Act of 2007 nganing mas mapusog asin epektivo an paglaban sa ‘’terrorist acts’’ na naghahasok nin kariribokan sa nasyon asin maseguro an satong seguridad nasyonal para sa namamanuan Filipino.

Yaon dyan si nangyaring Marawi siege maging homa pa sa ibang nasyon kan mga terorista. ‘’We do need a very strong anti-terrorism law. Certain provisions of HB 6875, however, threaten to put our countrymen in peril, practically squashing their civil liberties and putting their freedom in virtual jeopardy’’, sabi pa kan congresista kan tercer distrito kan CamSur.

Nahahadit man an assistant minority leader na maglalangkaw an mga caso sa pagbalga sa deretso humano maging indibidual na nagigiging kritiko kan gobierno kabale na an sektor nin media.

An saro sa miembros kan Camara-Baja asin kabale sa mga principal author na nagdefensa kan bill, Congresista Ruffy Biazon an nagbaliktad sagcod na pinabawi an saiyang pagvoto pabor sa bill huli ta discuntento sa nagkaperang mga probisyon na pig-adaptar si version kan senado.

Sinabi man ni Lagman na tama na an presenting Human Security Act (HSA) mas malala an Anti-terror Bill huli ta unconstitutional an nagkaperang probisyon.

Mas mapeligro an bill asin inaapod niyang ‘’draconian’’ na pera sana an yaon sa probisyon nganing maprotehiran an namamanuan contra sa mga pang-aabuso kan pulis asin militar.

An yaon sa anti-terror bill mas delicado pa sa mga kritiko kan gobierno asin nagtutubod siya na yaon na an HSA.

Hinurot kan grupo kan oposisyon na dai na muna isumeter ni House Speaker Alan Peter Cayetano sa Malacañan nganing adalan na marhay an mga probisyon nganing malinaw sa publiko. An bill nakapasar sa Camara-baja sa voto 168 ‘’yes’’, 36 ‘no’, asin 29 abstentions alagad afuera ki Salceda asin Biazon igwa nang doceng mga congresista an nagsibog na sa pagsuporta sa bill kabale na digdi si Congresista Marisa Andaya kan premir distrito kan Camarines Sur. (dpa)