LGU nakabutas nin fondo na sobra sa calamity fund

Pamplona, Camarines Sur – An banwaan na ini na sarong 4th class municipality na sakop kan segundo distrito kan CamSur alagad nakabutas nin P24 milyon na sobra pa sa saindang P7 milyon na calamity fund sa 2020 ngani sanang abuton an mga familia nin ayuda na apektado kan duwang bulan na lockdown.

Si Alcalde Ronaldo ‘Boy’ Franco nagpahayag an saiyang solusyon magtipon nin fondo hale sa mga savings kan LGU mantang kulang na marhay an saindang calamity fund na dai man dapat maubos huli ta harayo pa an bulan nin Deciembre.

Nagtarabangan sinda kan Sangguniang Bayan para makahanap nin fondo sa tahaw kan pandemia asin dakul na mga familia an apektado asin nawaran nin trabajo, sabi pa ni Franco.

Nagtutubod an jefe ejecutivo na mayo man sindang nabalgang ley mantang tinutugot ini ngonian kan gobierno nasyonal an pag-realigned nin fondo huli kan pandemia.

Duwang veces nakatao nin limang kilong bagas asin dress chicken cada familia asin ini nakatabang nganing makadagdag sa pagkakan aroaldaw kan mga familia na apektado kan lockdown huli kan coronavirus disease (Covid-19).

Maabot sa doce mil na familia an natabangan sa 36 mil na populasyon kan Pamplona. Ini afuera kan tabang finansyal na cinco mil pesos sa mga benipisyaryo kan Social Amelioration Program (SAP) kan Department of Social Welfare and Development.

Alagad nakaayon sa pigwarasan ninda nin dikit na ayuda finansyal iyo an mga opisyales de barangay nin tig-a dos mil pesos.

Igwa sana sinda nin P141 milyon na annual budget ngonian na 2020. (DPAureus)