Online enrollment sa Naga, epektibo

Sa premirong implementasyon kan Department of Education (DepEd) kan online enrollment marikas an numero kan mga estudiantes sa mga escuelas publica sa Ciudad nin Naga mala ngani sagcod kasoodma maabot na sa veinte cinco (25,000) mil an nakapalista.

Si OIC School Division Superintendent Dr. Manny de Guzman nagsabi an halangkaw na turnout kan enrollees resulta kan marikas na gamit sa kuminikasyon sa paagi kan internet, online maging text messages.

An 25 mil na enrollees hale sa natipon na mga listahan kan mga school principal asin supervisor sa cuarentang (40) escuelahan kan DepEd Naga na kabale digdi an kindergarten, elementarya asin segundarya.

Tubod an pamayo kan DepEd Naga na makukua man giraray ninda an maabot sa 49 mil na enrollees kaparejo kan record kan nagtalikod na school year 2019-2020.

Saro pa digdi iyo an kooperasyon kan mga magurang sa paagi sana kan text messages kan mga dating class adviser nakumfirmar tolos na an saindang aki maklase sa mas halangkaw na grado.

Alagad igwa man ibang mga magurang na dai makontak huli kan posibleng nagbago nin cp number asin ini dikit sanang por cientaje.

Hagad ni De Guzman sa mga magurang na magpasiring sa mga escuelahan an mga magurang na mayong contact number nganing aramon an mga cp numbers asin iba pang proceso mantang mayong ‘’face-to-face enrollment’’

Igwang binugtak na mga Public Assistance Command Center an Division Office kan DepEd Naga maging sa saindang oficina na puedeng maghapot digdi an mga magurang.