252 LSIs ipupuli kan PMS sa Bicol
Nagpaisi na sa onceng (11) mga lokal na gobierno sa Bicol an Presidential Management Staff (PMS) kan Malacañan nganing saindang ihatud sa maabot na Viernes, Hunyo 26 an ika-duwang batch kan mga Locally Stranded Individuals (LSIs), hale sa Metro Manila sa paagi kan Philippine National Railways (PNR) na mahali ngonian na Jueves sa Tutuban Station.
Igwang total na 252 na LSIs na ibababa sa PNR Stations kan Camarines Sur asin Albay, alagad antes sinda papalunadon sa train haleng Manila kumpleto nin mga papeles na kinababalihan nin barangay certificate, medical certificate asin maagi sinda sa rapid testing nganing maaraman tolos kun igwang sintomas o positivo sa coronavirus disease.
Saro sana an LSIs para sa LGU kan Camarines Norte.
Alagad pigcierto kan PMS na mayong tutugotan na mag-viaje kan positivo sa ‘’deadly virus’’.
An mga aagihan na PNR Stations iyo an Ragay, Libmanan asin Ciudad nin Naga, gabos sa Camarines Sur. Saro sanang pasajero an ibababa sa Ragay, doce sa Libmanan asin 69 sa Naga.
An PNR Station sa Naga na dakul an numero kan mga ibababang LSIs, sinabi ni Ernesto Elcamel jefe kan City Disaster Risk Reduction Management Office na sainda na ining pig-andam kan Public Safety Office, City Health Office asin PNP nganing estrictong ipasunod an gabos na proceso sa health standard.
An Camarines Sur na igwang 81 LSIs, ibababa sa PNR Station sa Libmanan asin susondoon sinda kan task force Covid-19 kan Capitolyo Provincial.
Si iba pang pasajeros para sa LGU Masbate igwang 48, 11 sa Catanduanes, lima sa Sorsogon, tolo sa Ciudad nin Ligao asin saro sa Ciudad nin Legazpi.
Sinda gabos ibababa sa Ligao City PNR Station nganing sabaton kan mga kanya-kanyang task force Covid-19 kan LGUs na dapat masunod an gabos na proceso sa health protocol.
An padagos na pagpuli kan LSIs sarong programa kan gobierno nasyonal sa paagi kan ‘’Hatid Tulong’’ initiative katuwang an manijamiento kan PNR.
An gobierno nagtao sa sainda nin cash assistance sa paagi kan Department of Social Welfare and Development (DSWD), libreng transportasyon, asin pagkakan. (dpa)
Enot na grupo kan mga Locally Stranded Individuals (LSIs) lunad sa train haling Tutuban PNR Station sa Manila pauli digdi sa Bicol. (PIA)