Debosyon ki Ina dai tanyog kan Covid-19

Imahen ni Nuestra Señora de Peñafrancia dai na maluwas sa simbahan para sa traslascion asin fluvial procession sa maabot na Peñafrancia fiesta alagad an debosyon magpapadagos. (mary.com)

Mayo nang mga actividadad sa Festividad ni Ina sa maabot na bulan nin Septiembre nin huli kan coronavirus disease alagad an debosyon magpapadagos sa paagi nin siyam na aldaw na sarabay na nobenaryo sa Naga Metropolitan Cathedral asin sa mga parokya kan Archidiocesis nin Caceres sa Camarines Sur.

Ini an mga pahayag ni Arsobispo Rolando Octavus J. Tria Tirona, OCC, DD kan Caceres sa ginibong press conference sa Peñafrancia Basilica Minore kan Sabado, Hunyo 27 sa Joint Declaration of the Archdiocese asin kan City Hall mantang nagrarani na an bulan nin Septiembre sa ika-138th Divino Rostro and 310th Our Lady of Peñafrancia Festivities ngonian na taon.

Envez kan prusisyon inaalok an devotos ipadagos an debosyon sa paagi kan mga novena masses sa mga parokya asin magtenir na sana sa saindang lokalidad asin dai na mag-viaje sa Ciudad nin Naga.

Enot nang nagluwas an bareta sa Bicol Mail isyu kan Hunyo 25 na cancelado na kan Simbahan an tradisyonal na Traslacion asin Fluvial procession ki Ina asin ki Divino Rostro maging an mga darakulang actividades kan City Hall na kinababalehan kan regional military parade, civic parade asin drum and lyre.

Alagad sa ginibong pirermahan kan Caceres asin kan City Hall sa Joint Declaration kasabay kan press conference piggibong pormal an kasundoan ninda Arsobispo Tirona asin Alcalde Nelson Legacion sa presencia kan iba pang may katungdang kan Simbahan, Naga City Police Office, Public Safety Office asin City Health Office.

Sinabi man ni Alcalde Legacion saindang papahiwason an inpormasyon sa publico para makaabot sa ibang lugar nganing dai na makabuyo na magpasiring sa Ciudad nin Naga huli ta cancelado na an traslacion asin fluvial procession asin iba pang mga actividades kan ciudad asin kan simbahan.

Kabale pa sa cancelado ngonian na taon dawn, Perdon, Harubay asin ano man na prusisyon; paghadok sa Ina’s miraculous images, sa Peñafrancia Shrine asin iba pang mga simbahan, kabale na an Manto ni Ina para sa healing and consolation; Gabos na civic asin actividades nin comercio, Voyadores Festival, Civic and Military Parades, Trade Fairs, Exhibits, Competition, Concerts asin gabos na tiripon o mass gatherings. (dpa)