HULI KAN COVID-19: Pagpalista sa Comelec padagos na suspendido

An Commission on Election (Comelec) nagpaluwas nin memorandum na sinususpende an continuing registration kan mga votantes para sa eleksyon sa 2022 hasta sa Agosto 31, 2020 alagad dai pang pigtalaan na petsa asin bulan kun nuarin ipapadagos an pagpalista sa mga opisina lokal kan commission.

Sa ngonian an transaksyon sana ninda iyo an pag-isyu nin voters registration na pinapaagi sa ‘‘window transaction’’, sabi ni Atty. Maico Julia Jr. an Election Officer sa Ciudad nin Naga.

An manga nagpipila sa luwas sana kan saindang opisina asin dai na muna tinutugot an face-to-face transaction.

Sinabi pa ni Julia na naghahalat sana an saindang opisina nin bagong Comelec resolution maging sa iba pang lugar huli ta an suspension kan rehistrasyon sa enterong nasyon.

Saiyang piglinaw na kun sagcod sana sa Agosto 31 an suspension sa maabot na Septiembre 1, 2020 dai pa sinda mabukas para sa ‘‘continuing registration’’, sabi kan kan Election Officer.

An harahalawig na pagsuspendi kan rehistrasyon huli kan coronavirus disease asin ini para sa seguridad kan empleados mantang kaipuhan an face-to-face kan pagpalista mas marhay kan igilid muna ‘‘indefinite’’, sabi pa.

An dahilan pa kan commission huli ta nagsusuroksokan an pagpalista sa mga opisina lokal delicado man an mapalista posibleng an iba igwang bitbit na ‘‘deadly virus’’

Halawig pa an panahon antes kan eleksyon sa Mayo 2022, dapat tawan muna nin kasegurohan an salud contra sa Covid-19.

An ‘‘continuing registration’’ pigpunan kan Enero 2020 alagad nagsara huli kan Covid-19 kan Marso 10.

Nag-aabot sana sa 3,247 an nakapalista sa sinambit na peryodo mantang an pinakahuring rehistradong votantes sa Naga labi sana sa 96 mil, sabi pa kan Comelec Naga.