Infirmary hospital gagamiton sa mga pasyente sa Covid-19
Nagpaluwas nang aviso an Bicol Medical Center (BMC) sa City Hall na pano na an saindang facilidad para sa mga pasyente kan coronavirus disease (Covid-19), kasunod kan mga piglalaog na bagong pasyente na nagpuling mga Locally Stranded Individual (LSIs) alagad nagpositivo matapos ipasairarum sa swab test.
An aksyon kan City Hall, gamiton an saindang pig-locked down na Our Lady of Lourdes Infirmary Hospital sa barangay Carolina bilang pag-andam encaso igwa naman na bagong Covid-19 case na mga LSIs na nag-aarabutan sa ciudad.
Ini an mga pahayag ni Alcalde Nelson Legacion matapos avisohan siya ni Dr. Joey Rañola kan BMC na dai na sinda maakong pasyente sa Covid-19 hale sa Ciudad nin Naga mantang pano na an saindang cuarto kan facilidad para sa pasyente na tinatamaan kan ‘’deadly virus’’.
An Ciudad nin Naga nagpapasalamat na sa cooperasyon kan publico huli ta zero case na sa Covid 19 sa laog nin cuarenta diyas alagad biglang nagbutwa an duwang caso kan mag-ina na mga locally stranded individuals hale sa Naic, Cavite kan magpuli sa Naga kan Hunyo 14 na nag-agi man kuta sa health protocol kan City Hall matapos kan rapid test alagad pag-abut sa swab test nagpositivo man giraray sa delicadong helang.
An ina nag-eedad nin 59 años asin 30 años an aking babae parejong residentes kan Spillyway brgy. Concepcion Pequeña na nagpapabulong na ngonian sa Covid-19 facility kan BMC asin sinda pig-apod na Bicol No. 91 asin Bicol No. 92.
Tolos nagconducir nin contact tracing an task force Covid-19 sa pag-iriba sa familia na pigpa-swab test na anas positivo sa caso asin nadagdagan si duwang pasyente asin pito na gabos sagcod kan Domingong hapon, Hunyo 28. Alagad nadagdagan naman an pasyente sa virus sagcod kasuodma asin igwa nang quince (15) gabos kadakli sa sainda mga taga Spillway, Concepcion Pequeña.
Huli kan marikas na paglangkaw kan caso sa ciudad, nagdesisyon si Legacion na bukasan sa Covid-19 case an infirmary hospital sa itaas na barangay kan ciudad.
Afuera kan mga taga Naga igwa pang ibang mga nag-arabutan na LSIs sa saro sa Pasacao, Tinambac,, Balatan, ciudad nin Iriga saro sa Canaman asin saro man sa Bula, gabos digdi sa Camarines Sur na pigpasa-irarum sinda sa swab test alagad anas nagpositivo asin yaon na sa hospital.
Nin huli ta kadakle kan nagpopositivo sa virus mga LSIs nagsurat an jefe ejecutivo sa Inter -Agency Task Force (IATF) na temporaryong pundohon muna an pagtransportar alagad piglinaw niya na habong papulion an mga taga ciudad envez mag-agi sa tamang protocol siring kan pagpa rapid test asin gabos na mga nagpupuruli sa ciudad magpa-cuarintina muna sa laog nin 14 dias.
An City Hall nag-andam na kan saindang quarantine facility na gagamiton an Don Leon Mercado High School na nagtugot giraray an Department of Education kan ciudad.