Border controls, checkpoint kan Capitolyo pabor sa City Hall

Naging paborable sa lokal na gobierno kan Ciudad nin Naga an aksyon kan gobierno provincial kan Camarines Sur na estrictohan an border controls asin checkpoint kasunod kan padagos na paglangkaw kan caso kan coronavirus disease na hale sa nagpupuruling locally stranded individuals (LSIs).


Sa press conference sa City Hall, sinabi ni Alcalde Nelson Legacion na pig-snab sana kan gobierno nasyonal sa paagi kan Inter-Agency Task Force an kahagadan kan ciudad na tawan sinda nin poder na magbugtak nin border control sa linderos kan Milaor, CSur asin Brgy. Mabulo, Ciudad nin Naga nganing estrictong iimplementar an health protocol sa mga nagpupuruling LSIs sa Naga.

An ginigibo na sana kan ciudad sa linderos kan Milaor-Naga iyo an pagheling kan mga ID kan naglalaog asin kun sinda LSIs dinadara sa JMR Coliseum para sa rapid testing.

Nakakatabang sa ciudad an pag-estricto kan Capitolyo Provincial sa border control asin checkpoint nganing si nagpururuling LSIs ciertong nasasara asin naagi sa proceso kan health protocol.


Nin huli kan pagbawi na sa mga LGU kan poder sa border control nakabuelo an nagpupuruling LSIs nakakalusot sa ciudad dawa dai nagaagi sa proceso kan health protocol an resulta nagparalangkaw an caso kan Covid 19 sa ciudad mala ngani sa ngonian hale da dating zero case sa laog nin cuarenta diyas, madaling nagparalangkaw asin nagaabot na sa 31 caso sagcod kan Hulyo 8.

Nagkapera nang mga banwaan sa Camarines Sur an igwa nang mga caso sa Covid 19 sagcod na nag-aksyon si Gobernador Migz Villafuerte nganing magpaluwas nin Executive Order No. 9, Serye kan 2020.

An EO nagtataong direktiva sa PNP na imantenir an mga checkpoint sa border kan Del Gallego asin Bato katuwang ninda an frontliners kan gobierno provincial nganing maseguro an implementasyon kan health protocol asin ipasunod an cuarintina.

An gabos na persona na tutugotan na makalaog sa provincial border kan mga nagpupuruling residentes dapat ilista an saindang pangaran, saen hale/saen napuling banwaan, asin kuanon an contact number.

Sinda tatawan nin temporaryong entry permit, na isusuko sa LGU na igwang juridiksyon sa saindang pupulian na lugar.

An gabos na persona na nag-aagi sa provincia iisuhan nin passes sa paagi kan permit upon entry sa provincial border asin dapat irehistro an plaka kan saindang vehiculo.

Alagad an sinambit na permit iwawalat sa provincial border sa saindang paghale o exit sa provincia asin iba pang mga rekisitos na dapat sunodon.


PAGPUGOL KAN LSIs PIG-ENDORSO KAN REG’L IATF

Inaprobaran kan Regional IATF an kahagadan kan City Hall na temporaryong pugolon muna an nagpupuruli sa Naga kan mga LSIs maging OFW sa laog nin quince hasta treinta diyas.

Sinabi pa ni Legacion na an 15 diyas magkakaigwa na nin bastanteng panahon nganing mabawasan an laog kan napapano nang mga quarantine facilities asin ilaog naman si bagong nag-arabot.

Huli kaini, pig-oopresir na an hotel asin home quarantine mantang padagos nagdadakul an LSIs asin nagpupuruling OFWs. (dpa)