Koneksyon sa internet problema sa online classes
An maluyang serbisyo sa internet connectivity saro sa naheheling na aatubangon na problema kan Department of Education (DepEd) sa masaling mga estudiante sa online classes sa maabot na school year 2020.
Bako lang DepEd maging sa resulta sa survey nagpapaheling na diez por ciento sana sa mga estudiantes sa Ciudad nin Naga an interesado sa online classes huli kan problema sa internet connection alagad kabale na digdi si kawaran nin gadget.
Ini an mga pahayag ni City School Division Superintendent Manny De Guzman kan DepEd sa Ciudad nin Naga dawa na ngani matabang an City School Board na mabugtakan nin mga wifi connections sa mga escuelahan.
Igwa pang treinta y nieve (39) diyas antes kan burokasan nin klase an saindang opisina central kan DepEd padagos an ginigibong coordinasyon sa DICT tanganing maresolberan an problema sa mga internet connection sa nasyon.
Sinabi ni De Guzman ginibo ninda an survey nganing maaraman sa mga estudiante kun anong modality an saindang sasalihan sa burokasan nin klase.
Si enot na nagluluwas na mga anuncio igigilid na an face-to-face learning envez naglaog sa utak kan mga estudiante iyo an online classes na an iimplementar kan ahencia huli kan problema sa padagos na paglangkaw kan coronavirus disease (Covid 19) na sagcod sa ngonian mayo pang nadidiscobreng bakuna contra sa virus.
Alagad sa tahaw kan mga ginigibong campanya kan ahencia na puedeng magpili an mga estudiante sa nagkaperang alternativong pag-adal na bako sanang online classes an ipapasunod envez nagkaperang modality.
Nagluwas sa survey kan DepEd Naga na nag-aabot sa 70 por ciento an nagpapabor sa modular learning asin pig-aandaman pa an klase sa radyo asin television.
Dinagdag pa ni De Guzman na puede pang magbago an diez por ciento sa online classes sa pigtalaan nindang pag-organisar kan mga klase sa escuelahan asin maheheling an tunay na situasyon sagcod na puedeng magbago an resulta sa survey alagad nagtutubod siya kun magbago man an desisyon kan mga estudiante piglalaoman na dai nang gayo mahira an diez por ciento.
An DepEd Naga igwang 49 mil na enrollees kan nagtalikod na school year asin sa pinakahuring nagpapalista hasta kan Hulyo 14, igwa nang 43 por ciento an nagpa-enroll sa pribadong escuelahan asin 85 por ciento sa escuelas publica.
Sa DepEd Bicol, sinabi ni Regional Director Guilbert Sadsad maging sa resulta sa survey sa rehiyon cinco nagaabot sana sa diez por ciento kan mga estudiantes an pabor sa online classes. (dpa)