‘‘Yes vote’’piglinaw ni LRay

Si Congresista LRay Villafuerte kan segundo distrito kan Camarines Sur nagpahayag na an saiyang pagvotong Yes na ibasura an aplikasyon sa renewal sa franquicia kan ABS CBN Network huli kan nagkaperang mga dahilan asin base sa desisyon sa ginibong mga committee hearings sa isyu sa franquicia kan network.


Saiyang pigbuyagyag na sa findings kan committee report kan Committee on Legislative Franchises nadiscobre an mga isyu sa citizenship kan network’s chairman Emeritus Gabby Lopez, alegasyon sa mga pagbalga sa labor laws, naging cuestionable an pigbabayad na buwis sa gobierno kun ikukumpara sa GMA 7, kabale na an isyu sa political bias asin iba pang mga reclamo.

Ini an mga mayor na dahilan kun tano ta dapat dai paboran ninda sa komite na maka-renew kan saindang franquicia an TV Network, sabi pa kan representante kan segundo distrito kan Camarines Sur.

Si Villafuerte kabale sa 70 miembros kan komite na nagvotong Yes nganing dagos nang ibasura an aplikasyon kan franquicia kan TV Network.

Sa tolong mga Bicolanong lehislador na miembros kan komite unikong si Congresista Gabby H. Bordado Jr. an nagvoto nganing matawan giraray nin franquicia an higanteng TV Network mantang an AKO Bicol Party list Representative Alfredo Garbin ‘Abstain’ an voto.

Enot nang pinaliwanag ni Bordado na an saiyang voto pabor sa renewal kan franquicia pinaagi niya sa mga consultasyon sa mga banwaan na sakop kan saiyang tercer distrito na an desisyon nagpapabor na dapat tugotan kan congreso na matawan liwat nin franquicia an network. Siya kabale sa onseng mga lehislador na nagvoto pabor sa renewal kan franquicia.

An Network nag-off air kan Mayo 2020 kasunod kan direktiva na sarahan kan National Telecommunication Commission matapos magpaso na an saindang veinte cinco años na franquicia.