Kontraktor kan bilyon pesos na edificio kan BMC sinururogan

Sa itaas na retrato hinahagadan nin paliwanag ni Usec Marvel Clavecilla (naka-itum na jacket), si Engr. Joebert Estrada (naka-tindog) kan Cuerpo Construction sa abalang pagtapos kan rectification sa 5 asin 8 storey bldg. Sa ibabang retrato si Engr. Estrada (naka-tukaw sa wala), matapos kan miting pig-atubang an mga ingeniero kan BMC asin TWG kan OPABA nganing urulayan an mga reclamo sa edificio asin taposon sa laog nin duwang semana (DPAureus)

Ginisagisa kan Office of the Presidential Adviser for Bicol Affairs (OPABA), Presidential Anti-Corruption Commission (PACC), mga ingeniero, doktor asin bids and award committee kan Bicol Medical Center an Cuerpo Construction Corp. huli ta grabe na ngani an negative slippage alagad igwa pang mga depekto an duwang bilyon pesos na world class na edificio kan Bicol Medical Center.

Napiritan an ingeniero na representante kan kontratista nganing magpangako na reresolber an mga depekto sa laog sana nin duwang semana matapos kan miting na pinaapod kan OPABA kan Viernes, Hulyo 17 na ginibo sa Avenue Plaza Hotel, Ciudad nin Naga.

Si Engr. Joebert Estrada kan Cuerpo Contruction Corp., nag-atubang sa miting na pinaapod ni Presidential Adviser for Bicol Affairs Marvel Clavecilla nganing hagadan nin paliwanag apesar na sarong taon na sinda kauurolay kan abalang pagtapos sa rectification sa kontruksyon kan 5 storey asin 8 storey bldg. alagad dai matapos-tapos.

MGA DEPEKTO SA EDIFICIO

Kabale sa mga inatubang na kahapotan iyo an minasunod, mga depekto sa patrabajo kan elevator na delicado kun magkaigwa nin paglinog; minor cracks sa lanub kan 3rd asin 5th floor kan 5 storey bldg.; apesar na mayo nin kakusog na duros huli sa bagyo an mga bintana nagkakaparasa; problema sa mga air condition unit; asin maluyang voltaje kan transformer.

Si Dr. Mary Jane Uy kan BMC nagtuyaw man na ‘‘high risk’’ an elevator sa mga pasyente asin personajes kan hospital asin sinabihan si Engr. Estrada na ‘‘budol-budol’’ sinda kan designed kan hospital.

Kabale pa sa tuyaw sa proyecto kan personajes kan BMC iyo an nagrurugnas nang mga lanub sa 5 storey bldg. asin grabe an init sa mga opisina huli sa problema sa air conditions.

PIGSERMONAN

Si Engr. Luis Zamudio kan Technical Working Group kan OPABA, suyado sa patrabajo kan elevator sagcod na saiyang pigsermonan an representante kan kontratista.

Saiyang sinabi na dai nakaposisyon sa tamang estraktura an elevator asin cuestionable pa an ginamit na materyales sagcod na peligroso ini kun maglinog.

Dai maipaliwanag ni Engr. Estrada an palpak na patrabajo kan elevator sa dahilan na saro siyang civil engineer asin hahaputon niya an kaibanan nindang structural engineer.

Si Tammy Lee, regional coordinator kan PACC Bicol inabot nin high blood sa miting sagcod na sermonan an kontratista huli ta sarong taon na sinda kauurolay dai pa giraray natatapos an mga rectification kan duwang edificio.

PATANID KAN OPABA

Sa entrevista kan Bicol Mail matapos kan miting sinabi ni Usec Clavecilla na kun nagtaong time line an kontratista na tataposon an minor defect sa laog nin duwang semana alagad dai marealisar mapipiritan siyang mag-recomendar nin ‘‘proper sanction’’ na pueding i-black list nationwide kan DPWH an Cuerpo Construction.