SA CIUDAD NIN NAGA: Php40 milyon mawawarang ingreso sa industriya nin turismo

Maabot sa cuarenta (40) milyon peso an mawawara sa revenues kan industriya nin turismo sa Ciudad nin Naga ngonian na taon kabale na digdi an kawaran nin actividades kan simbahan asin kan City Hall sa Festividad ni Ina sa bulan nin Septiembre 2020 epektivo kan coronavirus disease (Covid 19) pandemic.

Sa datus kan Arts Culture and Tourism Office (ACTO) kan lokal na gobierno kan ciudad sa 1.5 milyon na average kan tourist arrival sa laog nin sarong taon an ginagastos kan sarong turista sa ciudad inaabot nin P36 mil cada bisita naglangkaw ini kan nakaaging taon asin sa average na anom na aldaw sinda na-estar, buot sabihon kaini nasa P40 milyon an nawawara na ingreso sa industriya, sabi sa paliwanag Alec Francis Santos, jefe kan ACTO.

Ngonian na taon abot sa 80 por ciento an pagbagsak kan industriya nin huli kaini an ACTO sibot sa pagtabang sa tourism establishment lalo na sa kasaraditan nganing makakua sinda nin dugang na asistencia finansyal puedeng pautang kun ano pang paagi hale sa financing institution.

Napag-araman na igwa nang pendienteng house bill sa congreso nganing magtagama nin fondo para sa apektadong industriya nin turismo.

Kun dai cancelado an mga actividades kan simbahan asin LGU sa maabot na Peñafrancia fiesta makakabawi sinda kan presenting situasyon alagad dai marerealisar nin huli kan pandemya.

Sa panahon kan pagdangadang kan kapiestahan ni Ina bulan pa sana nin Hulyo asin Agosto ribo-ribo nang turista an nagaarabotan na pigkakarkulong on milyon sagcod sa Peñafrancia fiesta maging si pagtaraid na banwaan kan ciudad sagcod sa provincia an dinadayo nin turista alagad paralisado pa epekto kan Covid 19. Piglalaoman na makakarehistro sana nin 400,000 an tourist arrival ngonian na taon hale sa dating 1.5. milyon. (dpa)