Government Media

August 1, 2020

 

Atang dati nang maluya an influencia kan gobyerno nasyonal sa mga Bikolano mayo pang tultol na radyo o diyaryo na nagbabareta kan mga programa asin proyektos kan gobyerno na madaling maintindihan kan mga namamanwaan.


Sa totoo lang an pribadong media iyo an nagbabalangibog kan mga bareta aro-aldaw sa anom na provincias kan rehiyon Bikol.


Poon pa kan panahon ni Presidente Noynoy Aquino an Radyo ng Bayan sa Naga dai na nag-ooperar. Ultimong nadangog ko an tanog kan DWRB diyan sa Naga City Civic Center kan si Sammy Garcia pa an station manager. Ngonyan si Sammy nasa New York, USA na nag retire.


An pigngangalas ko ta gabos state of the art an mga gamit asin equipaje pero dai napapaandar an radyo kan gobyerno kaya lugod an mga tao nagdadangog kan mga bareta sa mga pribadong estasyon.


Maski sain digdi sa Bikol maluya an government radyo station maski duman pa sa regional center sa Legazpi City.


Siguro dapat asikasuhon ni Usec. Marvell Clavecilla, an Presidential Assistant sa Bikol na padihon ni Presidente Digong, kaklase pa sa San Beda Law School asin fraternity brother sa Los Stallones fraternity sa San Beda, na mapakusog an broadcast media na sadiri kan gobyerno digdi sa Bikol.


Kun nahimo ninda ni Chairman Dante Jimenez kan Presidential Anti-Corruption Commission na maibugtak an Bicol Malasakit Center sa Naga asin mapakarhay an servicio asin facilidades kan Bicol Medical Center, ini pa kayang Radyo ng Bayan an dai ninda matabangan?


Harani na pati an eleksyon sa 2022.


Akoon ta na an Bikol iyo an oposisyon center sa Pilipinas lalo na ta taga digdi si VP Leni Robredo. Bikol an balwarte kan mga kalaban ni Duterte.


Leksyon na garo sa mga kakampi kan administrasyon ni Duterte na linampaso an administration candidate kan 2019 midterm eleksyon sa kamot kan “Otso Diretso” opposition ticket na ipinagkampanya ni Vice-Presidente na dinangog kan mayoriya kan mga Bikolano.


Totoo gana an gabos na administration candidates sa ibang lugar kan Pilipinas kabali na an Metro Manila pero nagkadaraog sa Bikol.


Apat na taon na si Duterte sa pwesto pero dai pa lamang nadudutdot na mapakarhay an mga gamit kan Radyo ng Bayan tanganing ini maka-operar.


Nagiromduman ko kan nagtalikod na semana naimbitaran kami ni station manager Grace Refama Simando kan Radyo ng Bayan nganing mag-interview sa sarong nationwide broadcast tungkol sa isyu kan Covid19.
An espesyal na bisita iyo si Mayor Tom Bongalonta kan Pili capital town, si SK chairman Kayle Tripulca kan ciudad nin Naga.


Marhay ta nakapaliwanag man an duwa kan saindang mga naginibuhan sa Naga asin Pili alagad huli ta haliputon si panahon asin halawig si saindang mga simbag dai na kami nakadagdag nin mga kahaputan.
Mahapot pa kuta kami tungkol sa saindang reaksyon sa Balik Provincia Program kan gobyerno nasyonal asin kun ano an epekto kaini sa saindang mga LGUs kundi naputol na si programa.


Atang Bikol lang kuta na an centro kan pig-aapod na Laging Handa Network Briefing na pigpadrinohan kan Presidential Communication Operation Office (PCOO) asin kan Philippine Information Agency na pinapamayohan digdi sa Camarines Sur ni Ms. Lizel Macatangay pero igwa pang bisitang ASEC na taga-Bisaya na halawigon man si platika.


Siguro dakol nakadangog sa interview sa ibang rona pero mayong nakadangog digdi sa Bikol apuera sa paagui kan Facebook live streaming.


Inaapudan ko an mga Congressmen sa Bikol na asikasuhon man an problemang ini tungkol sa government media digdi sa Bikol antes mahuri an gabos.
****
Sari-saring reaksyon sa Sona 2020 ni Presidente Rodrigo Duterte.


Sa maghapon na survey sa mga para-antabay na ginibo kan MBC-DZRH sa Metro Manila maghapon kan Hulyo 27 aldaw kan Sona mas dakol an nagsimbag nin “angry” kesa sa “love”. Labing sarong ribo an anggot sa administrasyon kesa namomoot. An nag “wow” o neutral o daing labot labi lang sanggatos. 


An boot sabihon sa panahon nin Covid bako lang disganado kundi aranggot sa ginigibo kan gobyerno an kadaklan kan mga tao duman sa Kamaynilaan.


Orog na digdi sa Bikol manlaen-laen man an reaksyon pero pirmi nang mas dakol an anggot sa administrasyon.


Kadto pinapabayaan lang an sentimiento kan kadaklan na mga Bikolano kontra sa gobyerno huli ta an rehiyon Bikol tradisyonal na oposisyon maski kan panahon ni Marcos.


Alagad ngonyan dapat remedyuhan na kan mga nanunungdan na makumbinser kan gobyerno an mga Bikolano na dakol man an marhay na nagiginibohan kan presenteng administrasyon arog kan pagbalik dalagan kan Philippine National Railways.


An bilang kan positibo sa Covid en komparasyon sa ibang rona dikit man an sa Bikol apuera sa Naga asin sa Albay huli sa interbensyon kan government medical workers. 


Nagbabalik na sa new normal an buhay kan mga tao ngonyan maski dai pa nakakaralaog sa malls an mga tao huli ta mahigpit pa an gobyerno.


Mas disiplinado an mga Bikolano pag-abot sa pagsunod sa mga health protocols siring sa paggamit nin facemasks, face shields, pagmantiner nin social distancing asin pirming paghugas nin kamot asin siyempre pagparigos ta mainit an panahon.


Tapos na an pig-aapod na honeymoon period entri ni Duterte asin kan media asin kan saiyang mga taga hanga ta harani na pati an pirilian sa 2022.


Panahon na tanganing mag-isip-isip, maghorop-horop, maghiro-hiro asin magbago na an estratihiya an gobyerno sa pagpa-uswag asin pagtao nin kaogmahan asin katrangkilohan sa gabos na namamanwaan.

Share on Facebook
Share on Twitter
Please reload